魚樂無窮：最緊要坐得舒服
■噚日恒指高低波幅達600點，心理質素稍差，低位肯定被震走。 譚德潤攝
恒指1月埋單升足一成，為2015年大時代後最強單月升幅，如果1月效應有料到，今年見4萬點其實冇難度。當然，目標遠大一回事，你有冇能耐食曬成個升浪又係另一回事。就以昨日為例，低開再跌然後抽上
，埋單升279點，高低波幅更達600點，心理質素稍差，低位肯定已經被震走，然後眼光光睇住個市倒升，欲哭無淚。
唔希望上述情況發生在自己身上，最重要係坐貨坐得舒服。何謂坐貨坐得舒服？你問問自己，如果全日唔望報價機，會唔會坐立不安、茶飯不思？做到嘅話咪係舒服囉。簡單來說，就係孖展額不能過量，衍生工具佔倉位不能太大。
新股市場與大市同樣火熱，繼希瑪眼科（3309）四日喪升6倍後，新近歐化（1711）單日亦狂飆逾2倍，抽中的認真肥仔。唔知大家有冇留意，兩者均有名人效應，前者有馬化騰認購，後者則是楊受成做大股東。正在招股的芸芸新股，餐飲股佳民集團（8519）有著同樣炒作基因。集團主席黃佩茵乃城中名媛，其丈夫為金山工業（040）主席羅仲榮的公子，股東則有彤叔孫女婿龐建貽，以及中港照相（1123）太子爺孫道弘，且看這隻富二代概念股，股價能否闖出一片天。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com