財經評論：為層樓可以幾瘋狂
■嘉湖山莊目前買賣放盤量約290個，叫價低於500萬元的只剩9間。資料圖片
近呢一段時間，筆者身邊友人圍繞的話題不離「樓價好貴」、「點X上到車呀」；新聞就不斷有破頂、居屋王、公屋王等令人沮喪的消息出現，不禁令人想，究竟因咩解究香港人上個車都咁難，成個樓市為何如此扭曲
。放眼其他地區，好似日本北海道一個實用1,200呎的3房別墅，只係承惠160萬港元！
不過對於在香港紮根多年的人來說，點可以說走就走，當中有部份更擔心遲嚇連車都上唔到，其實這些擔心並非空穴來風。新界傳統上車樂園的天水圍嘉湖山莊，區內代理指，目前買賣放盤量約290個，連租約佔約一半，叫價低於500萬元只剩9間，首度跌穿雙位數。現時最平為美湖居5座高層戶，實用441方呎，叫價470萬元，叫價平當然有原因，皆因同層有多達3間凶宅，一層有咁多凶宅，就算實際無影響（即見唔到好朋友），個人都會成日疑神疑鬼。
以前的人一聽到凶宅都會敬而遠之，諗都唔會諗，點會想到𠵱家，香港人為上車，呢啲避諱都不顧呢。就好似今年大年初一，竟然有人買入一個凶宅，東湧映灣園5座中層一個實用495方呎的單位，以低市價近一成，558萬元成交，據指該單位曾發生跳樓事故。
除咗呢一宗之外，有留意新聞的話，都發現近期越來越多呢類單位成交，究竟樓市有幾扭曲先至令香港人咁大勇氣買入呢啲住得心寒的物業呢？今個星期三就公佈財政預算案，不如放長雙眼睇下政府點樣幫我哋呢啲升鬥市民置業，會唔會真係回應市民的訴求放寬按揭成數？
記者：葉煜燊
財經評論 舊文
來源 source: http://hk.finance.appledaily.com