魚樂無窮 - 唐牛 2018年2月8日
魚樂無窮：三個字分出勝負
■建議投資者每日收市後低倉位持股，並諗定明日大升或大跌時點樣做。資料圖片
港股一彈即散，即市高位計唔見逾千點，50天線再度失守，不厭其煩講多次，去年恒指慢牛曾經四次試穿50天線，每次皆能短時間內收復失地兼重拾升軌，若然今次打破常規，下一站支持要睇100天線29559。
今次守到50天線機會有幾大？我個人偏向悲觀。正如之前所講，去年挑戰底線全在慢牛情況下發生，但今年1月升勢明顯加快，加上成交增加，反映參與人數越來越多，所以殺落嚟既急且狠，蟹貨更由此而生，昨日一支穿頭破腳的大陰燭已說明一切。另一方面，股王騰訊（700）連續兩天失守50天線，形勢較去年王者榮耀事件及輪證大開殺戒更差，港股少埋呢個主要引擎，瓜多過菜。
好多人唔知道，估中走勢唔重要，「執行力」才是勝負關鍵。簡單來說，你要在電光火石之間，決定追揸沽策略，因為下一秒股價可以出現極大變化，贏輸就在那一刻分出。容祖兒都有唱啦，「遲來一秒鐘，遲疑一秒鐘，良緣永遠這樣斷送。」
「一開市就過山車，點諗到咁多嘢呀？」所以，我建議大家每日收市後都寫低倉位持股，並諗定明日大升或大跌時點樣做，如果仍抱住煮到埋嚟先食的心態，你會第一個俾人食咗落肚！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com