金融High Tea 2018年2月8日
華爾街教新抱
2018年02月08日
美股1月勁升，2月大跌，大市會否就此見頂？
呢個問題係近日市場焦點，教授級的中環茶友認為，股市大跌，實際原因只有一個，就係升得多，雖然指數急回，但1月份部份升幅仍在。恒指這一浪由28000點邊緣起步，O依家回調後股價仍然唔係平，個別板塊好似內銀股繼續喺高位。
揀儲局主席上場日殺倉
教授級茶友咁淡定，皆因佢高位無追貨，手上持貨大部份係低位買落長線揸。佢冷眼旁觀，笑言今次由美股大跌觸發調整，係典型華爾街教新抱手法。美股一踏入2月份就跌，正係耶倫掛冠，新聯儲局主席鮑威爾上場之日。
新主席上場就跌，客氣啲講係市場觀望新主席政策方向，俗啲講就係初歸新抱、落地孩兒，兩者都要教，新儲局行長宣誓就職，大鱷喺呢個時候拋低股市，係要警告佢若然大力加息，小心股市大跌。
儲局職能之一，係維持經濟繁榮，股市如持續低迷，必對景氣有打擊，不利儲局主席，所以放鷹放鴿要自己醒定。自上世紀八十年代格林斯潘以來，儲局主席都識做，同華爾街保持友好，新官遇跌市，都可安然渡過。
耶倫係聯儲局近年最短命主席，做左一任就收工，點解會咁呢？除左因為佢同總統特朗普唔同黨派外，她的利率政策是否符合特朗普選舉議程應該都係主要考慮。政治上，美國總統上任之初，都希望央行保持較緊利率政策，到任內第三年開始放鬆銀根，催谷經濟，以利連任。
以特朗普上任後美國經濟增速同股市上升步伐，都幾難升到佢連任之時。雖然有人話特朗普無諗過自己會做總統，話佢做左總統都未必想連任，但如果從傳統總統要求聯儲局配合自己仕途想法，美國加息步伐應要加快，然後先加後減，製造近選舉時的減息空間，前聯儲局主席格林斯潘在回憶錄中，提到克林頓有此要求。
如今華爾街諸公怕舊劇重演，趁新主席上場拋股示警，提醒佢要小心不要胡亂放鷹。照呢個睇法，大市有風波無災難，不過大家亦不宜過渡期望狂牛再來。
向聯儲局主席示完威，杜指前晚彈番567點，港股開市一度急升超過800點，但內地滬指中午急瀉，銀行板塊暴跌，搞到港股急回，倒跌收市。美銀美林發表研究報告指，北水由年初至今只佔港股成交量6%至7%，對市場影響有限。相比之下，今年年初至今已有1020億美元資金流入股市，美銀美林首席投資策略師Michael Hartnett早前發出強烈賣出信號，意味大市可能面對一個較大調整，投資者要加倍小心。
昨日A股回調，災區之一係銀行股，平安銀行跌7.7%，招商銀行跌6.4%，寧波銀行跌6%。四大行表現同告慘淡，建設銀行跌6%，工商銀行跌5.8%，農業銀行跌5.3%，中國銀行跌3.6%，有點升得多追跌味道。上證指數收報3309點，跌61點；深證成指收報10246點，跌130點。
A股拖住港股由升變跌，恒指收報30323點，跌272點；國企指數收報12433點，瀉253點，成交2183億元。
中資金融股受壓，平保(2318) 跌1.48%，收報83.1元；建行(939) 下滑2.64%，收報8.1元；工行(1398) 下滑1.74%。
美股反覆，官媒就發表文章指，今年全球股市可能呈現高波動性特質，主要因為美股估值偏高，加上全球股市普遍存在較強關聯性，美股波動可能引發全球股市震盪，而聯儲局會否超預期加息，成為全球股市面臨一大「黑天鵝」風險。
文章仲話，中國股市通常與世界其他股票市場關聯性較低，運行更多是自身因素決定，也須防止全球市場心理波動產生的共震風險。從官媒態度，中央都有防險意識，照計出事機會唔大。
陸羽仁
金融High Tea 舊文
來源 source: http://hdfin.stheadline.com