【大茶飯】騰訊業績指明路（青冰）
股王騰訊上周三收市後公佈業績，全年純利急增74%，勝預期，主要都係第四季表現好，咁大隻股王，每季出業績，都可
以每季打敗市場的預期，實在利害。更多
股王騰訊上周三收市後公佈業績，全年純利急增74%，勝預期，主要都係第四季表現好，咁大隻股王，每季出業績，都可以每季打敗市場的預期，實在利害，業績一出各紛絲狂喜，今次冇理由唔見500蚊喇呱，不過在當天夜期開市之後，不升反跌，令青冰意識到，應該有些細節出了問題，勝預期變了非重點，所以期指先會唔挾，最後找到兩個死因，遊戲收入按季下跌，及預告今年會更積極投資，或會令短期盈利受壓。
當晚ADR跌十蚊，翌日股價都係裂口低開，仲要段段沽段段殺，有分析指係衍生工具市場扭曲了股價走勢，這個業績冇可能唔升嘅，青冰從不會將兩者串連起來，其一是無助自己分析，其二是股王每天都有無數輪證交易，如果要影響應該每天都扭曲，再者我們經常看到的都只是輪證，但股王每天的場外成交，絕對不亞於場內，但這些資訊極少在傳媒曝光，而輪商見報時更會選擇性報導，好喇，去到最後，大家才知真正急挫的原因，就是配股。
遊戲收入按季下跌是可理解的，王者榮耀都hit咗成年，增長不再都正路，問題係有冇其他遊戲可以接棒，管理層話QQ飛車在年底先出，吃雞遊戲仲要18年先開始，相信未來一兩季先黎料，得唔得，Q1業績應該可見端倪。
騰訊份業績的presentation應記一功，充分顯示到佢地的高透明度，青冰平時做功課，最怕見到啲國企每季出業績，但就睇死人，有同比就冇環比，下下要開幾個通告出黎睇，頭都暈埋，但騰訊有按年的比較，環比及同比的比較，更加有環比的論析，令你知道每一個分部，按季有咩亮點或出咗咩問題，所以如果你有心睇曬56頁，係唔需要打去問財演，因為你都非常清楚。
好了，南非佬減持，騰訊主力遊戲又放緩，好似四面楚歌咁，老實說青冰唔認為份業績差，但肯定不是爆燈，四十幾倍PE最驟忌便是見到瑕疵，咁短期沽壓是難免的。但騰訊都點咗幾條明路俾我地，在第9頁佢講咗今年的展望及策略，七個點中有兩點係講投資，行業包括視頻內容、廣告定向及醫療上的人工智能，如果你捉得到騰訊的目標物，相信回報應比現價買騰訊更高，諗到的話，記住PM青冰啊，哈哈。
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com