利字當頭：唔好為創業而創業
■年輕人如果冇父幹，可以試嚇創業博一博，但唔好「為創業而創業」。資料圖片
小明有日好好彩，遇到傳說中有求必應嘅神仙：「神仙神仙，我有個願望，你可唔可以幫下我？我想四十歲退休，唔使做，享受人生。」
神仙：「哦，財務自由，好易箒。你努力讀書，入神科，然後做專
業人士；畢業之後賺到錢，攞曬的錢去買樓，然後租出去，等租客幫你供。之後，再買多層，再租出去。唔使廿年，你就有好多好多錢。」
小明：「神仙神仙，我已經成廿幾歲人，你係咪要我讀多兩個碩士學位？到時已經三張啦喎，又要結婚生仔。仲有，你有冇聽過壓力測試，有冇聽過辣招？仲有，你知唔知首期幾多錢？同埋呢，我份工呢，每個月剩底兩千……」
神仙：「咁，你有冇父幹？」小明：「有，十四歲就退咗休啦。」
早前有幸被友刊《經濟一週》約訪問，當中講到「今時唔同往日」；我講到八、九十年代中產階級上流之路已經「唔存在」，今時今日香港後生仔女，要搵自己嘅方向。磚頭，亦唔一定係投資，更大程度上應該視為消費。甚至連文憑，亦因為量化寬鬆而貶值；作為消費無問題，但當做投資就要識計數。
後生仔女可以點算？「趁後生，試嚇創業博一博。」估唔到我呢句話，網上反映竟然非常兩極；有人贊成，亦有人話「冇錢點創業？」，更有人覺得，創業係FF。
我其實都有講，唔好「為創業而創業」，一定要知自己有乜嘢可以賣。
不過，一日都係我唔好，應該講清楚究竟何謂「創業」。創業，唔係搞網，唔係出錢請人做嘢，更加唔係印印腳等收錢。創業好很辛苦，冇假放，成日睇住條數；信我，假如以為創業只有錢多就可以任性，很肯定失敗收場。
話說回頭，我亦識得唔少才俊，以創業心態打工，經營能力同人脈，一樣都可以好有睇頭，甚至最終都係照樣做老闆。
利世民
http://fb.com/leesimon.hk
本欄逢周二、四刊出
利世民
利字當頭 - 利世民 舊文
來源 source: http://hk.finance.appledaily.com