科技股都會息口敏感
2018年04月26日
美國債息升破三厘心理關口，令到美股大跌，美股一度大插超過600點，收市都跌超過400點。港股開市受壓，科技股呢排一樣無運行。
美國通脹升溫，債息冉冉向上，市場認為三厘係心理關口。由於經濟熱度未降，通脹勢頭維持，市場對利率向上估計日益明顯
。總統特朗普打貿易戰，表面上係為美國人爭取福利，短期卻有可能觸發通脹升溫，成為壓抑美股因素。喺跌市中，蘋果繼續成為焦點，因為相關產品供應商都發出定單減少訊息，令人確信蘋果銷售下降。稍後蘋果會公佈業績，市場關注公司盈利同會否將乘住稅改調回資金，用作派息。
熱錢減少影響融資估值
蘋果銷售勢頭不再係事實，但佢首季盈利表現如何則不能說準，皆因蘋果最近型號手機求價不求量，利錢明顯係深咗好多，所以出貨量減少，但係咪代表賺少咗錢，都仲係要到時先揭盅；相反，蘋果設備供應商喺求價策略下先受衝擊，似乎係無可避免，因為佢哋係靠量賺錢。香港手機設備股因而繼續下插，舜宇光學(2382) 跌逾3%，報130.5元；瑞聲科技(2018) 跌1.2%，報117.4元。
美國科技股下挫，都拖累到本港呢個板塊，騰訊(700) 股價跌2.5%，最低曾見384.8元，收報386.8元，創今年新低，拖低恒指69點。自從騰訊被南非大股東減持，陸羽仁唔似其他人對佢咁有信心，擔心少咗過千億元買佢的資金被吸走會影響表現，所以市場O依家話佢第四季遊戲業務表現遜預期，股價因此轉弱，可能只係表面理由，實際都係資金流向主導。
睇埋熱爆新股平安健康醫療科技(1833) 截孖展，但同樣賣吓科技概念的母公司平保(2318) 照跌2%，報81.65元，就知科技股板塊唔係咁勁。
科技股基本上唔會舉好多債，表面上唔算息口敏感股，但睇番過去經驗，每逢美國息口向上，都對科技股不利。最明顯係二千年，美息向上刺破咗科網股泡沫。科技股同息口關係在於利率低企時，資金供應好多，債券回報低，資金風險胃納增加，大家樂意投入科技投資，科技股好易融資，估值亦高。
隨著息口回升，資金成本增加，容易錢減少，加上穩定收益如債券回報增加，熱錢流入增長型股份就減少，若然股市回調埋，咁就有更多穩陣又吸引回報機會，所以科技股雖然唔同地產股，會受買家負擔上升影響，但都一樣會對息口作出反應，特別係去年全球科技股都升到去一個高水平，O依家食胡仲有大把水位，部份資金自然會鎖定利潤。
俄鋁炒消息有排玩
喺美股拖累之下，恒指一早就低開，最多曾跌392點，收造30328點，跌308點；國企指數收報12094點，下滑150點，成交980億元。O依家港股市況都係神經質，跟住消息炒作，往後幾日一個關注焦點就係美國財長姆欽將會訪華，總統特朗普話，除非中美達成貿易協議，否則關稅將繼續實施。他認為中美「很有機會達成協議」，特朗普經常玩先硬後軟，策略反覆無常，呢啲政治市基本上係美國佬玩晒，普通投資者只能低位執貨，高位唔好高追，藉以減低被人摑完一巴又一巴風險。
美國佬搞政治市典型，莫過完話禁制俄鋁(486) 突然又鬆口。美國財政部表示制裁俄鋁，令佢股價短時間插到去1.31元，突然美國將限制最後期限從6月5日延後到10月23日，同時開出只要有大股東歐柏嘉賣股就可考慮放寬，令俄鋁股價周一急彈，昨早再一度彈上2.31元，到收市就報2.17元，微跌1仙。照走勢睇佢股價可能大漲小回，但俄鋁點解決呢個政治危機，相信未來仲有好多消息，唔會咁快踏入坦途，好似有消息俄羅斯政府不排除從歐柏嘉手中購入俄鋁(486) 股份，但目前未有詳細定案，俄國政府話想買俄鋁，美國政府會唔會接受呢？喺呢啲環境，低位夠膽撈貨有錢賺者可以考慮定好止賺位，唔到唔沽，盡量坐多一陣。
陸羽仁
金融High Tea 舊文
來源 source: http://hdfin.stheadline.com