智取大市：下星期反高潮位
■呢輪股市同個股經常出現反高潮。 資料圖片
外電講到華為被FBI調查，後果可能比中興通訊（763）更嚴重，科網、手機設備股自然全線急跌，已經一定程度發酵到華為將會被罰，跟住又會點呢……
好明顯，首先市場要估計FBI調查嘅進度，華為係咪死梗？定係死唔去？你將聽
到好多左搖右擺嘅消息。不過，下星期話鋒一轉，焦點將會分散去資管新規同埋美國貿易代表訪華事宜，會係不明朗因素定係轉機？公佈資管新規方面，要注意壓抑保險資金流入資產市場同埋監管理財產品方面有幾辣，同時要留意實施時間表，可能要畀保險公司同銀行時間走盞處理資產。
至於美國貿易代表訪華又點？你可以回想前排劉鶴訪美想見特朗普被拒，唔見當然冇偈傾一定係壞消息，如果約好曬又肯見，雙方就預咗可以有渣拿拎返去交代，有機會係win win situation了，希望為市場帶嚟轉機。
呢輪真係要接受股市同個股經常有反高潮日子，要同時克服假希望同恐懼，用適量持倉令自己喺跌市時唔會太驚。稍好嘅方法係趁單日恐慌性跌市撈本來一直強勢、但單日大跌嘅股，買完有幸即市等到佢跌幅收窄，就沽一半拉低餘貨平均價，餘貨唔輸就坐落去。例如噚日嘅李寧（2331），朝早無啦啦插半成，尾市就跌幅收窄一半了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com