【股場解密】揀藥股買更考功夫 藥股做乜逐隻數（歐陽風）
2018-5-18 9:44:56
自從本周MSCI明晟公布A股入摩詳情後，醫藥股升到唔識得停，假如一早做好部署，今轉升浪都算和味矣。事實上北水亦早作部署，買定一堆醫藥股等收割，不過這些北水近日開始食糊，藥明生物（02269
.HK）等熱門股開始見北水流出，有貨可以分段食糊。
多得中金一早提示，今轉醫藥股升浪完全在預期之內，由於MSCI計股份入摩方法好簡單，就是睇市值同成交，既然中港醫藥股升咗咁多，入摩亦好合理，這些股份就算升得多，論市值同巨無霸內銀、內房比仍然是差距相當遙遠，因此唔需要太過驚呢類股份炒完。
行業唔係問題，揀股才考功夫。有自行研發新藥、臨床實驗成果的醫藥股，由於潛力較大亦會獲得國內投資者更大支持，因此上升動力一般較強，如三生製藥（01530.HK）、中國生物製藥（01177.HK）等。
至於有可能炒錯的股份，如白雲山（00874.HK）是中藥加保健品及飲料，石四藥（02005.HK）做開輸液軟袋，即是「打點滴」個盛器，自研藥只佔好細比例，這是行業類增長股，行業用得多輸液生意就多，唔會有特殊業績驚喜。呢兩隻股份有可能炒得過咗龍，入摩指唔代表估值可以亂咁計。
至於康哲藥業（0867.HK）的投資者更為理性，一早於本月初見頂後反覆向下，無視同業炒上，皆因呢間公司主力做批發銷售，又係低端醫藥股，毛利提升空間有限，即使落後都唔值得買。諗來諗去到係三生同中生製藥更值得候低吸納。
歐陽風
股場解密 - 歐陽風 舊文
來源 source: http://www.winmoney.hk