笑到最後 - 高明 2018年5月7日
笑到最後：後市三大可能性
■港股始終係資金市，只要熱錢一走，就冇得炒。 資料圖片
黑期及ADR顯示，星期一港股開市有機會高開300點，立即收復三萬點水平，不過，相同嘅挾上挾落，係過去兩個月已經試過無限咁多次，係呢啲情況之下，如果仍然話堅信大牛市未完，1月嗰種升浪好快出現，似乎有啲不切實際。
去年港股出現一個大升浪，以騰訊（700）為首嘅科技股帶動，一度令人有遐想，就係港股終於可以依靠體現價值而出現升浪，最終或者可以出現如美股長達十年嘅大牛市。
可惜嘅係，今年美股小股災之後，北水對港股嘅熱情大減，由去年狂買變咗今年有出有入，令到港股處於挨打狀態，最後發覺港股仍然係資金市，只要熱錢一走，就冇得炒。
不過，只要港股股齡唔太短嘅人，都唔會咁快氣餒，撇除2015年突然之間憧憬北水南下之外，港股本來就係上落市。呢兩個月嘅港股就好似2014年前嘅港股多年來這縮影：當你覺得有突破，就打返落嚟；當你覺得世界末日，又會升返轉頭。歸根究底，都係市場操作搵交易對手，好淡邊一邊太多倉，就殺嗰邊。一年殺幾轉倉令長線投資者心淡，最後港股只宜投機，不直投資。
𠵱家嘅港股走勢，至少有好、中、壞三個可能性。
好：正如樓上所講，回到2014年前嘅港股，無間上落市，永遠喺4,000點上落，直到下一轉熱錢湧入。高明覺得呢個機會較大，除非新興市場出現貨幣危機。
中：邊度起泡邊度散。今次慢牛並無大量散戶參與，同樣高位回落亦唔多散戶被炸。所以呢種情況係，邊隻炒得太多，會回返起點，無乜點升嘅影響不大。舊年係少數股票牛市，今年就係局部熊市。
壞：全面熊市。美股牛市十年，如果贏開巷嗰班覺得賺夠，想畀其他人賺，已經有排沽。美股估值帶領全球，一旦下跌，其他市場都要下調估值。高明覺得全熊機會較低，但亦不得不防。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com