金融High Tea 2018年5月16日
A股入摩步聲漸近
2018年05月16日
外匯基金派發今年首季投資成績表，收入按年大減60%，睇番全球投資市場表現，呢個都係預算之內。坦白講，去年外匯基金大豐收，O依家調整吓，挑戰其實唔嚴峻，皆因O依家美息處於向上周期，息升債券價格下跌，金管局持有大量美債，等如行上坡路，而且愈行愈斜。
金管局總裁陳德霖話，今年投資環境難以與去年比較，在利率趨升下資產價格將受影響，股市前景難以預測，稱今年投資環境更困難。現實上嚟講，增長推動通脹升溫，利率必然上調，直至冷卻經濟為止，中央銀行O依家政策係冷卻而唔係暖化經濟，從宏觀大氣候，息口趨向向上，會成為投資最大阻力。
不過，呢兩日同政經界猛人傾起，佢話香港政府剛剛公佈，首季按年實質增長4.7%，高於上季3.4%，連續第六個季度高於過去十年平均每年2.7%趨勢增長率。雖然政府仍然維持全年經濟增長預測3至4%，但聽聞首季呢個增長數字都令政府有啲意外。
加息下增長要買股
今年首季股市旺，可能有財富效應因素，加上貿易戰因素未產生影響，第二季情況未必會咁好。如果用第一季數字計，增長有4.7%，若然通脹有2%，兩者加埋用公碼計名義增長有成6.7%，用呢個數字去睇，O依家香港利率遠唔係2%，仲係遠低過增長，更加唔好講話加埋通脹因素落去。處於呢種情況，理論上至少應該將部份資金投資股市，先至能拉番高整體回報。
O依家投資者問題係面對兩個不明朗因素，一個係聯儲局政策；另一個係美國總統特朗普觸發的政策風險。聯儲局加息步伐左右資金流向，但以目前美國同全球經濟勢頭，美息逐步向上係可以預期，關鍵只係快定慢，所以利率因素不確定性唔算太高。相比下，特朗普神經刀作風，就令人莫衷一是。好似佢同中國打貿易戰，波及科技公司。點知日前佢又忽然發文，話會諗辦法解決中興通訊(763) 制裁風波。美國商務部長羅斯跟住放風，表示正研究其他方法制裁中興通訊，又話希望可藉著美國總統特朗普和中國主席習近平之間的密切關係促成協議。《華爾街日報》亦報道，中國和美國接近就中興通訊和農業關稅達成共識，美國將解除對中興通訊制裁，中國亦不再對大豆等價值數十億美元美國農產品徵收懲罰關稅。
特朗普忽然對中興鬆章，涉及眾多因素，可能同要中國幫手和北韓達成協議，又或者唔想中國幫伊朗，同時唔想中美貿易打大交，影響同中興做生意的美國企業。早前美國財政部制裁俄鋁(486) 時已經發生過。由於俄鋁喺全球市場佔有份額太大，華盛頓強制唔准同佢做生意，搞到好多美國企業有生產停頓威脅，最後美國惟有放寬對俄鋁限制，要求大股東賣股就得。美國佬打制裁牌，遊戲規則完全佢話點就點，仲經常轉來轉去，投資者企錯邊就好易被佢玩死。
喺咁嘅環境下，短期因素有時唔睇得太多，猛人話佢策略就係分散注碼。佢認為利息升，都係因為經濟好，現階段唔需要驚到完全避開股市，因為唔買股好難追到一年6至7%帳面增值，他的投資策略係恒指喺30000點下買入大股或指數基金，先收息再博反彈，至於特朗普出口術，佢就當住佢唱歌。
金融板塊佔比重
大市連升六日後，就算有中興好消息都一樣要回吐，恒指收造31152點，跌返389點；國企指數收報12440點，下滑103點，成交1052億元。升得多的藍籌回調亦急，騰訊(700) 急跌3.4%，再穿400元關，收報398元，大股東配完股點都傷咗元氣，股王好難話一口氣升唔回頭。之前累升唔少的舜宇光學(2382) 回跌2.5%，收報149.6元；友邦保險(1299) 跌1.7%，收報73.1元。業績唔對辦的瑞聲科技(2018) 再挫5%，收報110.1元。
下個月A股正式入摩，隨著呢個日子步聲漸近，入摩個股名單終於公佈，新增A股股票11隻，合計標的有234隻，創業板上市公司無一入圍。
去在首批名單中，金融、周期權重最高，消費其次，234隻納入標的中，滬港通150隻，深港通84隻。標的平均市值約1118億元，數量佔A股6.7%，流通市值佔A股54%左右。首批標的基本覆蓋上證50、滬深300等大盤指數絕大部份成份股，對於中小盤覆蓋率較低。花旗估計，初期資金流入約180億美元，對日均交易額700億美元的A股市場，該行認為影響並不明顯，不過股市有時係講心理多過講實質，係咪無影響好多時都仲要睇埋氣氛。
陸羽仁
金融High Tea 舊文
來源 source: http://hdfin.stheadline.com