【實力取勝】人人都係格仔龍（陳承龍）（第183期）
2018-6-28 15:46:32
呢排個市氣氛麻麻，作為長期大好友嘅小弟，都要避下，如果博反彈呢，記住炒格仔就算，三兩格就好走，可能要等到11月美國中期選舉，特朗普可唔可以成功連任，先知個市嘅明確方向。不過如果堅持要博反彈
呢，就要攞返舊年12月個底嚟做指標，因為依家基本上係政治市，好多政策嘅嘢都冇得估，一日話利好一日話唔利好，總之惡搞，依家唔係老散輪錢，係而連大戶都被波及見紅，之前買咗石藥集團（1093）同華潤水泥（1333）嗰個大戶，都終於要入肉，輸緊幾成呀，smart money變咗lose money，呢一浪都咪話唔凶殘。舉咗呢個例子，大家都知呢排炒股嘅難度喺邊，記緊持盈保泰啦，要做都要做「格仔龍」呀。
話咁快呢，就嚟又到書展啦，小弟可以大大聲同大家講：「我終於寫好本書啦。」大家係咪想知本書講咩呢？喺呢度賣下關子啦，喺呢本未有終極書名嘅書，會由小弟當年出嚟社會打滾開始，講到我開策略王嘅事，當中會提到好多小弟覺得非常有幸識到嘅猛人，亦都會提到好多小弟炒股（其實係鳩衝）嘅故事。新認識小弟嘅朋友、讀者或者未必知，其實我係一段日子輸到褲穿窿，爭證劵公司戶口過百萬，但好快就還清，之後仲賺到凸。究竟係小弟處理難關嘅技巧好、定係純好彩好運數、或者係好多貴人扶持我呢個小老散呢？喂，到時買本書睇咪知咯，唔係百幾十都同我慳丫嘛。
講到市況淡靜，搵到錢就話去慶功啫，呢排小弟就趁市淡加緊操練，正所謂「我話會操到，就一定操到」，就如呢篇文張配相所見，係咪瘦到唔認得我、同平時睇直播時有唔同呢？小弟係呢度講個真相大家知，瘦先係真正嘅陳承龍，肥嗰個，係假嘅，大家忘記佢。記住，陳承龍係又弗又瘦又有型，知道未？
實力取勝 - 陳承龍 舊文
來源 source: http://www.winmoney.hk