生活 - 葉朗程 2018年6月28日
牌斥
確是一個爛得不再爛的司機，我曾經停牌六個月。
復牌後痛定思痛，決心做一個負責任的道路使用者。決心到什麼地步？決心到買了人生第一部 SUV，背後的 rationale 是，希望開著一部較大的車，人會定一點，車會慢一點，嘗試學懂享受速度以外的駕駛樂趣。
誰不知原來開 SUV 扣分扣得仲快。
廣告
開著一部體積大馬力大的車，你對速度的敏感度會更低，一不留神已經是每小時九十公里。有時候會覺得時速限制不合理，大佬，呢條路開七十都嫌慢，運輸處竟然 set 五十？但一想到不知有多少意外就是源於魯莽的司機，我就知道自己不能怪人。
損友 Benson 有次跟我說：「你架車用公司名登記，超速可以唔使扣分㗎。」嚇？「鐳射槍捉到嗰啲就冇計啦，但影快相呢啲，有錢就擋到㗎喇。」點擋？「運輸處，定係交通部，我都唔得喇，總之有人會封信畀你，叫你 identify 喺超速嗰日揸車個司機。」即係我？「你知係你啫，咁你可以話 identify 唔到㗎嘛。」咁就可以當咩事都冇發生過？「又唔係，要交幾千蚊罰款囉。」罰咩呀？「罰你 identify 唔到司機囉。」作為律師，you are asking me to cheat？「喂葉生，你教㗎喎，富可敵國嘅人，由零到一百億，得三種方法。」
廣告
Be first，做第一個。
Be smarter， 做醒啲嗰個。
Or cheat，以上兩樣都做唔到，就做呃嗰個。
講大話唔係我強項，所以我決定承膽責任，再次上一個駕駛改進課程。冇錯，係再次，係再再次。每個臨近停牌邊緣的司機，只要想一個駕駛改進課程，便可以拿回三分。
以前去灣仔上開就好地地，導師係一個長頭髮紮辮嘅阿叔，有精神聽佢噏兩句都幾得意，冇精神低頭玩電話佢又唔會搞你。
點知今次約唔到灣仔，要走去荃灣。
呢邊個阿 sir 好唔同，竟然會搞小組討論，唔係隨得你自生自滅。
上堂嘅多數都係職業司機，如果唔係夜晚約咗人食飯，其實我真係寧願著得 casual 啲。
分組之後，唔知點解我每個組員都好興奮，好期待陣間導師問嘅問題，仲要一早講好曬，問邊種問題就邊個負責答。我本來都嘗試豁出去扮投入，點知由自我介紹環節開始，我就畀人孤立咗。
甲：我揸的士。
乙：我揸小巴。
丙：我揸的士。
此時，甲和丙來了一個 high five。
丁：我揸貨車。
輪到我，千份之一秒只想到一個最有說服力的答案，講完先知瀨嘢。
「我揸 Uber。」
來源 source: http://thestandnews.com
生活 - 葉朗程 舊文