金手指：政變、貿戰、俄鋁 - 孫柏文
特朗普喺未來兩個月，都會超被動，因為被11月初國會中期選舉牽制。 資料圖片
今周開市，恒指繼續跌。睇華文傳媒，就話因特朗普要再搞大對大陸嘅關稅。講真，真正理由係上周美帝出咗就業數據，人工升幅好大，令花旗國股市插鑊甘。
之前啲人仲估今次加息浪只會去
到2019年（甚至今年年尾已加完）。不過出完數據，就開始諗息口會否真係不斷加到2020，甚至重返5厘、6厘。真係唔敢諗到時港樓價會點。
至於貿戰，華文傳媒仲喺度估特朗普想點。其實，特朗普喺未來兩個月，都會超被動，因為被11月初本土中期選舉牽制。花旗民主黨初選，啲老人家一個又一個被少壯超左膠射下馬。留得低嘅，就要左膠上身。左膠一貫係自己鍾意嘅嘢要免費（用「呢個係基本人權」做包裝），唔鍾意嘅嘢就要政府禁。佢哋唔鍾意特朗普，所以就算民選都好，要禁，即係政變。民主黨贏，就會隊佢落台。
其實呢場政變，成功與否，先係左右貿戰關鍵。特朗普輸，就冇得收番。佢贏，就可以再講數。所以中央已擺出態度，等中期選舉之後再算。
至於俄鋁（486），佢哋賣嘅鋁種類，溢價越升越有，因啲人真係驚10月尾制裁會落實。10月尾，即中期選舉前。如要我估，唔會有定案住，我諗又會延期。不過大家買咗嘅，要有心理準備冇延期，要將股票提倉，兼停牌。我們已成沙粒，飛沙風中轉。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com