大棋局：萬稅萬稅萬萬稅 - Mr. Tregunter
選擇以萬稅萬稅萬萬稅去應對美元萬劍歸宗，追藝人逃稅、海外逃稅只係第一步。圖為範冰冰。 資料圖片
最近打開報紙都見到內地同稅有關的新聞。娛樂圈陰陽合同問題，範冰冰各種傳聞不斷；打機都要徵稅，搞到騰訊（700）股
價急跌；網上熱議因人口老化問題，官方用單身稅逼人結婚生仔。當然重有香港人最關心嘅，呢頭話醒你內地居住證有福利，嗰頭將你納入內地稅網嘅大禮。以上種種，多少都同CRS有關。
2014年經濟合作與發展組織（OECD）喺G20峯會上公佈咗一個重要協議，叫共同申報準則（Common Reporting Standard），即CRS。簡單嚟講，就係超過100個國家及地區，互相通報協議國公民喺自己國家有幾多財產，目的係打擊逃稅同洗黑錢。舉個例，大陸某個有錢佬喺新西蘭有幾棟樓同新西蘭嘅銀行戶口有幾千萬，以前大陸政府係唔知道你實數有幾多。當實行CRS後，大家對數，政府就知道你有冇逃稅同走後門將錢送出國。中國就喺今年9月第一次實行金融訊息互換。
但有一點很特別，100個國家及地區中冇美國份，點解？因為美國2010年已通過FATCA，即俗稱肥貓或肥咖條款嚟追海外逃追。CRS同FATCA分別在於，CRS係國際性協議，而FATCA只係美國本土法律。但從執行上梗係FATCA比較有效，因為國際性協議講求大家自律，而美國法律可以利用其特殊嘅美元體系主導地位令你不得不跟。
中國萬稅抵抗美加息
如果你細心會看到，CRS係國與國之間的訊息互換，FATCA係美國追美國人逃稅，而美國又冇加入CRS，美國就成為一個缺口，想避稅嘅人會走去美國。例如美國特拉華州，稅務正義網絡（Tax Justice Network）曾評其為避稅天堂首位。同美國簽FATCA互換訊息嘅國家，得到的訊息不對稱，即美國唔會畀曬所有資料你。就係咁小嘅區別，令美國離岸金融規模，由2015年佔全球14%，升到2017年22.3%，全球第一。
美歐英日四大央行都陸續或準備收水，中國係唔敢呢刻大規模放水。但在貿易戰情勢下，外滙收入將陸續減少，要錢，中國選擇以萬稅萬稅萬萬稅去應對美元萬劍歸宗。
從各種跡象睇，中國似乎要量中華之物力，頂到今浪美國加息周期完結，即2020左右，捱過美元回流。養住最多錢嘅地方係樓，十三屆全國人大常委會立法規劃公佈，房地產稅法、證券法（修改）被列入第一項目，已經係今年第八次提到房地產稅，追藝人逃稅、海外逃稅只係第一步。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com