【大茶飯】加息之後會點走（青冰）
恆指連升四天，累漲近千點，比起這幾個月來的反彈，以幅度計實在唔多，但感覺上今次似模似樣。自6月份恆指跌穿三萬點大關之後，從來都未試過連升5日，如今日中秋佳節為恆指破魔咒，真係皆大歡喜。本港跟隨美國加息，已經講咗兩年，一直都停留在得個講字，每次美國加息，我
地都原地踏步，簡直令青冰懷疑讀書時學的聯繫匯率制度，是否枉讀。大量資金泊港，有息差都唔賺而留守港元，去年的解讀就話炒港股玩IPO，不過今年市況咁曳，應該冇呢支歌唱，但都黎到九月的最後一個星期，才有極大機會加息，真係算頂得耐。早於去年，青冰認為港股應該炒到加息先至見頂，咁事實證明錯曬啦，反而在接近加息之時，港股來一個小陽春，實在諷刺。
長久之來，加息周期中，股市表現都係一直向好，真正減息先至係大鑊，但在QE十年間，咩都扭曲曬，牛熊交替亦比較快，青冰早前寫過，近十年的跌市中，最長都不會超過一年，今次是否另一個短命熊，過多幾星期就知，至於加息係咪會令樓市降溫或轉勢，相信要半年才可看通。
上周五港股升得係威係勢，撞啱港元好倉突襲反攻，一日殺了五百點子，難免令兩者畫上等號，但只要你用心睇番過去幾年，港元單日急升係耐唔耐都有的事，對港股的指標性不高，不過如果港元轉強成為了趨勢，即係話企返落7.8樓下，咁對港股就應該有利好作用。港元走勢，其實不單純只是資金流向，還有數量龐大的利差交易牽涉其中，今周加息及季結完結之後，究竟市場會否因上周五殺倉而令港元空倉收歛，定係繼續玩利差，應該好快有答案。
加息的另一個影響，就是令股市中尋息的資金，多一個選擇，當定存息率愈來愈高，而匯控(0005)及香港電訊(6823)都可以做到穩定派息兼有增長，在過去幾年吃香的中小型高息股，加息實在再添壓力，除非你的業務仍keep到有增長，否則靠個穩字，將難敵估值下調，意思即係若近期因市況唔掂而跟住插，反彈市又升唔足，就係下調囉。
按此即查：恒指即時報價
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com