笑到最後：如何對抗Old Seafood文化 - 高明
香港官僚體系多Old Seafood，皆因香港發生過97年前移民潮同2008年量化寬鬆。 資料圖片
不經不覺之間，高明亦已成為Old Seafood一員。近日同剛入職嘅新人傾偈，對Old Seafood文化沮喪而無奈。點解Old
Seafood喺香港橫行，無太多人解釋到，正值新學年開學，值得高明「恃老賣老」幫新人上一堂。
Old Seafood原名老屎忽，特徵眾多，但最令人不齒嘅特徵係「能力與職位不相稱」。所有官僚體系都必然出現Old Seafood，奇怪嘅係，香港算係一個有效率嘅市場，能力與職位不相稱本應被淘汰，反而居高位則係階級流動性出現問題。
造成呢個落差，因為香港發生過兩件事：97年前移民潮、2008年量化寬鬆。97年前移民潮，一大堆有實力嘅人退場，結果係導致一啲未夠班嘅人無故搭順風車上位。唔少受益者訪問講當年職場，話90年代唔走留喺官僚體系，隔個月加人工，再隔個月升職，因為冇人做。
本來金融危機就係清洗一啲腐化企業嘅機會，偏偏美國實行量化寬鬆，將一眾Old Seafood連同Old Seafood企業一次過救返曬，唔單止救返，量化寬鬆推高樓價，令班Old Seafood量化寬鬆再發多次達。香港結構上亦發展唔到新經濟取代舊經濟，令到本地Old Seafood永續。
Old Seafood喺香港已經制度化，新人只有認清事實自我安慰：以前香港並無想像中咁「肯捱就會成功」，打工最開心一段只有89年至97年留喺官僚體系嘅人，之前同之後都係得個捱字。如果「想當年」真係咁富庶，今日老人家就唔使2蚊優惠搭車，而係有錢到要畀雙倍價錢都仲係唔志在。
所以結論係灰暗之餘又不失積極。灰暗之處係Old Seafood已落地生根，無法改變；積極係今日香港已經唔會餓死人。新人應該盡量隨心所欲做自己鍾意嘅事，因為靠打工永遠唔會發達，但又唔會餓得死你。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com