財路：銀彈足 百富拒絕再跌 - 錢雋
百富環球手頭大把銀彈，股價已經拒絕再跌。圖為百富環球行政總裁蘆傑。 資料圖片
個市插到阿媽唔認得，但部份股份已經拒絕再跌，百富環球（327）係其一，手頭大把銀彈之餘，食住無紙化支付趨勢，對主打電子支付終端解決方案本業，有支持作用，可以望嚇。
百富到
今年6月尾，手頭現金20.5億元，得借款1,200萬元，淨現金高達20億元，係現市值40億元一半水位，夠曬安全。百富主打電子支付終端瓣數，按咨詢機構評估，到2025年時，全球市場規模會上到1,160億美元，增幅倍翻。
咁睇，無紙化支付已經係趨勢，尤其包括新興體好似中東、拉丁美洲同獨聯體等國家，對呢個瓣數需求仍然好大。
再睇百富，到咗今年6月，百富喺上邊相關地區銷售增幅，講緊係45%到翻半番水位。
又美國同加拿大地區佔百富今年上半年銷售額唔夠一成比重，其餘包括中國地區嘅銷售額，達到92%，上邊新興體佔比，達到69%。
睇到係，百富所佔美國地區細，就算貿易戰真係有影響咁計，估計對百富影響好細，隨住新興體銷售擴大，亦可以抵銷到對其他地區潛在影響。
場內專業預測，百富今、明兩年EPS 0.45元同0.51元，現價3.57元預測PE，得7.9倍同7倍。場內行家，有內地新國都（深300130），同年預測PE18倍同11倍，海外有美國惠爾訊（美US），預測PE亦講緊15倍同13倍，百富平咗半，換著大牛市，百富呢個數據，點會咁樣樣？
但呢段時節，個市橫風橫雨，又參考百富呢半年橫行區，雞仔注先炒住上落，百富再跌，到3.27元兜轉，上到近半年橫行頂4蚊水位，有兩成升幅，都有魚有肉。
錢雋
細價股專家
本欄逢周二刊出
財路 - 錢雋 舊文
來源 source: http://hk.finance.appledaily.com