金手指 ：真．樓市見頂訊號 - 孫柏文
睇曬特首林鄭月娥施政報告及之後嘅說話，得出一個結論，林鄭係終極港女。
資料圖片
上周孫柏文睇曬特首林鄭月娥施政報告及之後嘅說話，結論得一。就係佢係終極港女。我作為香港研究港女嘅專家，得出呢個結論，係因實在太多證據。
首先，港女第一價值觀，就係
要面。所以，佢哋最鍾意去嘅地方，就係道德高地。特首喺施政報告一開波話「呢啲係建議，乜都有得傾」，就諗住企得好穩喺道德高地。點知，港女另一惡習，就係前言不對後語，過冇兩日，就隧道費，特首話「冇時間再傾」。
今次施政報告畀我最大嘅感覺，就係呢次係繼97年「八萬五」嗰份後，政府自我信心最強嘅一次。我嘅結論係，雖然上周我話當啲死硬唔入市嘅人，例如張超雄，都買樓時，就係見頂訊號。原來，真．終極樓市見頂訊號，係政府對自己嘅自信心。
息口不斷攀升，不出數月，「東大嶼」嘅生命力，就會似「八萬五」。唯一阻住「冇咗啦」出現，就係港女死要面，打死都唔會收番講過的話。
最後波叔話賣「大嶼債」。如果賣，大家要瞓身。因為政府勒死其他地供應，死都死個回報畀你。就算最後都係蝕，港女咁要面，一定包你底。因為港女最叻，就係慷他人之慨，令自己好睇。手袋確實有用，林鄭就係嗰啲會列出所有手袋用途之人，話有好多人撐佢用納稅人嘅錢，買個廿萬Birkin。仲要話廿萬買到，好抵！
睇息口走勢，我唯一忠告就係，特首，小心腳部健康啊。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com