中環在線：新股女王過檔對家卓佳 - 李華華
鍾絳虹
「新股女王」鍾絳虹（Pamela，圖）上個禮拜離開做咗25年嘅中央證券登記，班賓架都好關心佢去向。噚日佢聯同新老闆一齊揭盅，原來是「過檔」中央證券「對頭」卓佳，擔任董事總經理。
卓佳噚日專登book咗五星級酒店嘅function
room開記招，隆重歡迎Pamela，就知新東家幾重視佢啦！Pamela話，人工固然有加，但很大因素係卓佳承諾畀佢高自由度，若佢喺IPO方面有新提議，可直接向老闆反映，「資本市場就係要快，若要問好多，好煩，我亦冇耐性。」Pamela話正考慮推出e-voting等新產品，但強調所有新產品要符合上市規則，所以未有確實計劃。
卓佳香港副行政總裁溫佩麟不諱言，以今年本港IPO宗數計，卓佳嘅市佔率超過50%，但以集資額計，卓佳嘅市佔率僅約10%，希望Pamela為公司爭取更多大型新股嘅客戶，令市佔率有倍數嘅增長。
Pamela喺中央證券工作咗四份一世紀，佢話舊僱主和同事都對她好好，形容今次離開好似「離婚」，五味紛陳。外界好驚訝佢毋須「過冷河」，立即跳槽至競爭對手。她話舊公司嘅合約係25年前簽訂，期間沒有加入離職限制條款，只是需要3個月通知期或賠錢。
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com