魚樂無窮：投資組合必需品 - 唐牛
𠵱家客觀形勢係向下尋底格，投資者若硬要在逆流下搶攻，只會事倍功半。 資料圖片
上周末獲邀擔任投資講座演講嘉賓之一，題目是高息股自己揀。「加息潮殺到喎，仲叫人買高息股？」冇錯，呢排美國10年期債息狂挾，令一眾以高息為賣點的公用股及房
託股冇啖好食，紛紛由高位回落。
不過，長遠來說，優質高息股交到數之餘又有穩定派息，依然係股票組合的必需品，只要計好數入場，便可增加勝算，正如港人最愛的買樓收租，價值都唔會因為加息而消失。錯過講座的戰友們不用擔心，第二彈即將推出，詳情請留意本欄fb專頁。
席間亦有觀眾向唐牛吐苦水，因為高追騰訊（700）硬生生蝕了三分之一，問有乜方法可以追番。每遇有這些問題，我都會叫對方先調整一下心態，輸了錢後唔好淨係諗住點樣收復失地，要睇清楚客觀形勢。𠵱家客觀形勢係天下大亂，股市小漲大回，向下尋底格，硬要在逆流下搶攻，只會事倍功半，輸得更慘。講到呢度，不其然諗到股神畢菲特的永恒金句︰「投資第一條準則是不要虧損，第二條準則請參考第一條。」
美股周二狂彈，帶動夜期抽高近400點，只要噚晚冇乜冬瓜豆腐，恒指今日高開應無懸念，但上周四留下的大裂口，仍有一半未回補，26200點阻力極大，小心睇路。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com