智取大市 - 晉佳 2018年10月24日
智取大市：全球股市碌落山？ - 晉佳
韓國股市長線走勢同港股原來頗為相似，共通點大概係港韓經濟同樣受中國大幅度影響。 資料圖片 適中字型 較大字型
中央總動員救市後，A股由低位兩日彈8%，再單日跌逾2%，至少反映A股投資者不太相信中央救市有短期作用，根本冇人敢高追，中央呢嚇一鼓作氣可算是短期失敗。
睇返噚日A股最活躍股份，九成股份下跌兼跌幅唔細。跌嘅仲唔止係A股，仲有日韓等亞太區市場，如果燒埋去美股，跌市便算蔓延到全世界。
其中韓國KOSPI指數，長線走勢同恒指原來頗為相似，共通點大概係港韓經濟同樣受中國大幅度影響。睇周線圖，KOSPI指數喺舊年升市時，一路沿住周線保歷加中上軸上升，直至今年第二季變為橫行市，然後下跌，最近一次反彈至中軸受阻，然後再向下跌穿下軸，浪比浪低，有碌落山之勢，唔多唔少顯示中國經濟放緩嘅問題，對亞太市場產生感染性。
睇埋歐洲，德國DAX指數同樣趨勢，10月中旬周線圖跌穿保歷加下軸，經過短期喘定後，又準備碌落山了。
無論從韓國、德國股市圖表睇，抑或消息上A股總動員救市冇人信，都預示呢轉拋售潮停不了嘅事實，一切只能等長期嚴重超賣訊號出現。長期而言，買股票係賭資產市場未爆煲，保得住金融體系頭顱。守得住，大陸救市招數喺幾個月內就能夠浮現，講到尾都係等超賣。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com