魚樂無窮 - 唐牛 2018年10月4日
魚樂無窮：一起走過的日子 - 唐牛
港交所胡亂DQ、強制停牌公司退市，令僅餘的炒作空間也消失。 資料圖片
民間特首為香港團結基金的短片旁白，力撐東大嶼的大規模填海計劃，惹來極大迴響，本欄不擅評論時事，也非娛樂新聞眼，誰是誰非留待「專家們」下判斷，但只想講一句，搵食箒犯法呀之餘，也應該要嚴守底線。
我炒股炒上腦，好似電腦程式盤咁，將短片中的「香港」換成「港股」，劈頭第一句便問大家，「你覺得港股仲有冇希望」。𠵱家十個散戶九個都答你冇，剩番一個依然樂觀？睇真啲，原來乃熊軍大將。
「港股曾經行得好快」，係，一年前恒指拋離道指一萬點，但去到今時今日，兩者差距得番幾百點，恒指昨早低見26840點，差點跌穿道指收市水平，呢個宇宙級死亡交叉嘅出現，只是時間問題。
「想港股繼續向前行，取捨係在所難免」，可惜港交所只懂胡亂DQ、強制停牌公司退市，令僅餘的炒作空間也消失，你問嚇今年散戶究竟輸在細價股還是新經濟股，就會明白呢種取捨，實在可免則免。
「你想下一年，見到一個點樣嘅港股？」幾可肯定，今年餘下日子都唔易過，𠵱家不如放鬆心情，唱番首一起走過的日子，起碼有你有我有情有生有死有義吖。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com