【實力取勝】騰訊唔跌穿300唔流眼淚（陳承龍）（第197期）
2018-10-4 16:59:50
繼續熊霸天下，廢話唔講，入正題。騰訊（700）呢隻一定要Put，第一係因為出咗重組方案都冇反應，完全刺激唔到股價。騰訊旗下騰訊音樂娛樂提交美國上市申請，《路透》旗下《IFR》指公
司尋求估值約250億美元，即係1950億港元左右。700早前分拆閱文集團（772），IPO令市場凍資逾5000億元，分拆易鑫（2858）又凍資逾3820億元，兩次都係旺市，令700股價更加硬淨，但今次宣佈分拆騰訊音樂，騰訊股價繼續謝皮，似乎都係唔好預兆。
第二，至截稿日，騰訊再次回購，係第17次出手，以每股介乎313元至319.4元，斥資3917萬元，回購12.4萬股。自9月7日，騰訊每個日都回購，前後買咗超過6.13億元，但股價都扯唔起，你哋話大唔大件事？
兩個利好消息都無助股價，騰訊11月14日會公布第三季業績，估計都唔會好睇，加加埋埋，都應該幾好Put。再者，騰訊好多不利因素，又話遊戲收唔到錢，又乜又物，點都要Put。
講開又講丫，第四季一開始即係10月2日，恒指無緣無故跌662點，好多人都問跌咁多發生乜事，實情就係乜事都冇發生，外圍冇事，前一晚美股又升，但恒指跌咗662點，冇利淡因素都咁插法，呢啲先恐怖，真係山雨欲來，隨時有大事發生。資金唔講講大話，唔使食誠實豆沙包，佢沽貨就人，即係話個market有問題，咁呢個時候應該開牛定開熊，明啦！
實力取勝 - 陳承龍 舊文
來源 source: http://www.winmoney.hk