經濟客飯 - 曾國平 2018年12月7日
經濟客飯：末日博士will never die - 曾國平
末日博士will never die，因為人類有一項強勁的本能，就是想睇人PK的魚蛋論心理。互聯網圖片 適中字型 較大字型
壞的鐘一日總有兩次對。長期預測市場崩潰，只要持之以恒也總有成功預測做先知的一日。只要無人記得你錯只記得你對，做末日博士是穩健投資。於是，末日博士供應充足，足以填滿雜誌封面和財經頭版。
有供應，那需求何來？末日博士跟財演不同，除了叫你揸現金之類，不會叫你買呢樣果樣，照計對投資者沒有吸引力。不過呢，除了想知道投資貼士，其實人類有一個更強的本能，就是想睇人PK的魚蛋論心理。你有錢賺我冇又或者唔夠多，我當然想世界末日欣賞你點樣折墮。股市如是樓市如是，傳媒報道或身邊無數成功故事激發的不是積極向上的意志，而是一個人冇我冇的負能量盼望。末日博士每日提醒你這一日即將到來，其實是體貼的心理治療。除此本能之外，「等低位入市」也是所有投資者的夢想，眼見股價樓價一升再升，心有不甘慨嘆時不與我，只有末日博士不離不棄給你溫馨鼓勵：唔使急，等多陣就可以啦！
有供應有需求，末日博士will never die。
「講咁X多剩係識話人，咁你又認為個市會升幾多跌幾多吖？」你好可能會有如此反應，就如成日有人講「你咁叻，不如你去選/做特首吖」一樣。
我只想講，小孩揭穿國王冇著衫就夠了，遮醜布無必要送上。
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出
經濟客飯 - 曾國平 舊文
來源 source: http://hk.finance.appledaily.com