智取大市 - 晉佳 2019年1月18日
智取大市：退休投資大錦囊 - 晉佳
指數基金之父博格爾話短炒係死路一條，佢就憑長線投資，經營出一間資產值4萬億美金嘅領航。資料圖片 適中字型 較大字型
投資市場只要有波幅嘅地方，就有人賺錢，當然我哋有冇本事去賺係另一件事。有人努力不懈地不停挑戰各種高回報方法，用真金白銀實踐，最終或弄至焦頭爛額，就如做高風險生意博發達而失敗收場，唔代表你冇努力過。指數基金之父博格爾話短炒係死路一條，佢就憑長線投資，經營出一間資產值4萬億美金嘅領航。
點解畢菲特對博格爾推崇備至？原因係博格爾利用佢嘅長線投資理念，幫客戶賺錢，而佢自己只得8,000萬美金身家。畢菲特都係做差唔多嘅事，但係佢利用保險公司資金、高槓桿去為自己長線投資回報變倍，贏嘅自己落袋。畢菲特形容博格爾嘅偉大，不無道理。
博格爾不吝嗇自己嘅投資理念，近年講到將股票回報分為投資回報同投機回報兩部份，簡單嘅分析邏輯，成為佢畢生嘅精髓。投資回報係買入股票為自己帶嚟股息同埋公司自身增長部份；投機回報係當市場嘅市盈率低之時，長線未來預測回報就相當高，相反亦對，藉住市盈率上升提高回報。呢套方法話畀你知，喺市場低估值之際，買入有持續提升回報能力、派息穩定上升嘅公司，可以話最簡單、最少變數而能夠讓資本變倍嘅方法，如果閣下買股票目的只為退休有錢使、不求發達。當中並非求其買嚇滙控（005）、中電（002）咁簡單，有時間再講。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com