智取大市 - 晉佳 2019年3月18日
智取大市：業績喪炒的玄機 - 晉佳
東嶽今年升勢暫時不算特別標青，但整固後走勢似轉強。 資料圖片 適中字型 較大字型
近期炒業績為㷫烚烚，亦有表面睇嚟冇乜特別嘅消息，都可以炒到股價上天。時代中國（1233）固然業績爆靚，大灣區概念有收成，急升合理。特步（1368）業績靚，管理層對今年增長有信心，估值隨即爆上至增長股行列，單日曾升近兩成都誇張。
優質個股喺呢個升浪之中，由低位累積升幅不會一下子完成，途中有稍為正面嘅消息，就加快推高股價嘅過程，呢類玩法相信會持續。特步大升後，就輪到李寧（2331）星期四業績，雖然升咗唔少，但業績前若略為受壓，仍然係吸納機會。
東嶽（189）今年升勢暫時不算強，但整固後走勢似轉強。一間曾經獲胡錦濤參觀，但亦曾俾CFO透過內房項目穿櫃桶底偷走15億嘅公司，足證企業管治過往有問題，但兩年幾前成功排除萬難復牌，重拾舊觀，賬目能夠嚴格過關實在罕見。前排預告全年多賺至少三成，即下半年純利至少8.74億人民幣，但較上半年減少最多27.6%。但用下半年度行業較差情況下嘅業績粗略年度化，市盈率賣緊5.8倍，市賬率1.3倍，淨現金有成12億人幣，每年能累積逾10億現金流回籠，估值有上升條件，下期繼續講。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com