魚樂無窮 - 唐牛 2019年3月19日
魚樂無窮：超值概念股熱身 - 唐牛
飛思達科技2016年底在創業板掛牌，去年底轉主板。圖右為執行董事施德群。 資料圖片 適中字型 較大字型
有些股票無論你手持幾多睇淡理據，也是不能沽空的，因為好大機會輸錢，最佳例子為領展（823），股息率低、賣曬啲商場拖低收入、資產增值有盡時，但股價新高再新高，空軍全部被抬離場，我會解釋為磚頭投資價值更低，資金便轉戰流通量高、使費較低嘅REITs。
另一個例子必數港鐵（066），列車互炒咁大鑊，今日埋單竟然倒升。大家唔善忙嘅話，都會記得舊年沙中線工程醜聞，曾令港鐵股價急插一下，但未幾即止跌回升，最後更再破頂。當時已指出，政府乃港鐵大股東，一定唔會睇住佢死，甚麼管治問題、營運問題，全部變得冇問題。記住，港鐵只能趁出事低吸，想造淡贏錢，實在妙想天開。
飛思達科技（1782）轉板後首度公佈全年業績，核心盈利增長36%至3,009萬人仔，末期息1.2仙，集團主打APM業務，美國同業New Relic仍在蝕錢階段，但過去一年股價爆升四倍，飛思達有盈利有息派，市值未夠5億銀，PE屬低雙位數，估值平到震？還有一點要留意，集團講明未來會加強5G及超寬帶相關業務，連最強概念都有埋，昨日3%升幅點會夠喉？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com