國建拆骨食肉總相宜
2019年03月12日
雖然港匯疲弱，需要金管局入市維穩，但港股經過上周五大插後，跟隨A股反彈回升。噚日內地股市反彈1.9%，港股就彈1%，都係跌得多就彈得多。內地股市似係牛市調整，未似玩完，仍然是趁調整吸納嘅格局。
中環茶友另一話題係賣盤復牌大升
嘅香港國際建投(687) ，皆因陸羽仁之前分析過，話呢隻股係海航屬下，海航要大賣非核心資產還債，國建賣盤機會相當高，有茶友之後就買入。O依家公司果然易手，每股作價3元，噚日收報2.96元，升咗12%。上咗車嘅茶友搭咗順風車，已經穩坐釣魚船，關鍵係應唔應食胡同埋點樣食胡。
黑石接貨料有下集
點解茶友會有此一問呢？原因之一係今次賣盤價格3元，比大家想像中略低。雖然係咁，茶友喺2.4元左右買入，短線獲利25%，覺得相當和味，所以心思思想沽貨食胡。另一方面，有茶友細讀公司通告，覺得賣盤仍然可能有下集，覺得仲有機會等公司拆骨再食，咁就由頭到尾都咁好味。
根據國建公佈，大股東會向Times Holding II Limited出售69.5%股權，總代價70.23億元，上述交易相等於每股作價3元。根據收購合併守則，買方會用每股現金3元提出全購。公告仲話，買家由黑石集團最終控股嘅多個基金組成，將來計劃維持公司上市地位。交易完成後，黑石有意將香港國際建投喺香港嘅房地產資產變現同分派公司閒置現金，改善並合理處理公司資產組合。茶友睇完呢個公佈，開始明白點解收購價會低過佢嘅估計，而且估計買家未來會上演下集嘅拆骨大計。
茶友認為，海航喺全球有套現大方向，國建都納入賣仔計劃。國建主要持有啟德地皮，另外亦有建築等業務。海航要賣仔，最好連公司都一口氣出售，咁就連上市地位都唔浪費。但係，有興趣買地嘅會德豐，對上市公司地位同建築等資產都冇興趣，只係願意買地。海航想快快按套現大方向落實，於是先賣地皮，再賣上市公司，而且公司可能連等賣地收錢都嫌慢，所以就用折讓價，成間公司賣畀黑石。黑石本身係基金公司，唔營運具體業務，買入公司好大機會只係拆骨。
如果呢個估計冇錯，黑石喺賣地完成後，好大機會將套現所得全部派息，然後再搵買家收購公司。黑石願意用3元一股接貨，將來派嘅股息，相信唔應該少過呢個數字，以確保基金封咗蝕本門，至於出售建築資產以至上市地位就係賺。
由於黑石要墊付收購資金，部份資產好似手頭嘅債券又有風險，加上日後要再搵買家，做咁多工作，而且未必成功，照計點都要有番20%水位，咁即係話未來派息同賣公司，應該至少都有3.6元，但究竟實際情況係咪咁，日後收購文件嘅估值報告同財務顧問意見就會見到端倪。
依照茶友拆局，對於今次收購可以有三個方案。第一個係賺快錢，食肉唔食骨，即係O依家沽貨或者接受3元收購，呢個做法只係食最肥美嘅部份，然後將資金另覓其他賺錢方法。第二個係食肉又食骨，即係唔接受收購，坐喺度等黑石先收回賣地資金派息，再等出售其他資產分錢，實行賺到盡。最後一個方法係無肉食博食骨，就係冇貨者O依家入市，同黑石行埋一齊，等買家拆骨後分紅。
三個方案邊個好？世事冇一定嘅答案，揀邊個就要睇睇手頭有冇貨、手頭資金鬆緊，同埋承受風險能力。如果手頭多貨少錢，又想穩陣，咁就當然係食肉方案，若然錢多貨少又肯冒險，食骨方案都冇話唔可以。茶友係穩陣派，佢自己就揀斬邊留邊，先用一半接受收購，留番一半食肉又食骨。佢笑言，從今次交易可見，投資之道冇絕對，好多時係睇自己財力同風險承受能力，好多時贏同輸都會因人處境不同，呢個係投資最有藝術嘅地方。
A股彈起港股愈升愈有
大市方面，A股帶頭反彈，滬指重越3000點大關，上證指數收報3026點，升1.92%；深證指數以全日高位收市，收報9704點，升3.6%。兩市成交合計約9445億元人民幣。恒指高開37點後愈升愈有，升穿28500點，收報28503點，漲274點；國指跑贏大市，收彈120點，報11276點，成交金額1028億元。
科網軟件股表現突出，美圖(1357) 收升9.6%，報4.24元；美團點評(3690) 績前落鑊，股價收漲3.6%，報58.9元。醫藥股有資金追入，復旦張江(1349) 擬發A股喺科創板上市，收飆26.4%，報7.48元；美瑞健康(2327) 公佈，喺中國從事大麻加工嘅聯營公司雲南漢素，同從事電子煙嘅深圳卓力能及陳佳敏和鄒樹林組合營，開拓工業大麻提取物霧化液研究、開發、銷售同埋喺醫療方面等創新性應用，美瑞健康收飆14%，報1.08元。
陸羽仁
金融High Tea 舊文
來源 source: http://hdfin.stheadline.com