商品冷股短線投機
2019年03月07日
恒指噚日微升76點，升幅得0.3%，但上證就勁升1.6%，企上3100點嘅高位。港股叫做今年第一次喺29000點之上收市，不過上升力度遠遠不及內地。睇嚟港股喺呢個水平回吐壓力唔細，係咪可以企穩有待觀察。
豬股炒上 鋼股緩升
本地藍籌股升勢比較大路，主力係靠股王騰訊(700) 帶領過關。冷門板塊就炒作豬肉，龍頭萬洲(288) 收升4.3%，報7.3元。二、三線股仔升幅就更明顯，中糧肉食(1610) 創新高，再升2.3%，報2.7元；雨潤(1068) 更抽高13%，報1.87元。
豬肉股當炒，應驗咗低殘板塊容易彈嘅說法。舊年豬肉股好黑仔，萬洲入咗成份股冇耐，先係遇上中美貿易戰爆發，美國市場佔一定份額嘅萬洲即時大插，跟住內地又發豬瘟，對股價雪上加霜，股價低見5.11元，由高位勁跌一半。去到舊年年尾中美關係稍為回暖，萬洲股價先開始回升，但O依家離高價仲差三成，成個板塊仍然落後。
最近豬肉股炒上，主要係受內地豬肉價格回升帶動。豬肉同好多商品一樣，經常受供求波動影響，豬價一旦上升，農民就大量養豬，結果就出現崩價。舊年中糧肉食(1610) 業績由盈轉虧，皆因市況差劣，但市差開始影響供應，中糧肉食股價就喺劣績中見底。近月豬價走俏，內地農曆新年期間生豬價格仲打破「逢節就跌」嘅規律，出現明顯反彈，刺激中糧肉食股價屢創新高。
同樣係豬肉股嘅雨潤，狀況就更離奇，除咗行業因素外，公司股價過去幾年異常低迷，皆因傳出主席祝義材被調查嘅消息。直至今年1月尾，雨潤話近日發現網媒轉載祝義材嘅報道，當中提及祝氏行賄南京中央商場員工同挪用商場公款。
董事會諮詢祝義材，佢確認中央商場已經作出澄清，中國檢察機關認為當中提及嘅事件唔構成挪用公款，主動撤回行賄等罪名指控。換言之，即係話大股東曾面對指控，但已經平安大吉，消息公佈後冇耐，雨潤股價大幅炒上，由0.58元起步，截止噚日已經累升3.6倍。
豬肉股今年頭開始起動，當時陸羽仁都提過當中嘅投機價值。豬肉股呢個板塊十分細小，除咗萬洲規模較大，其他相對都算冷門。由於豬肉都係商品，價格波動大，當業績有好消息，股價可能已經見頂，相反到壞消息湧現後買貨，由於業績唔穩定，所以唔易做長線投資，短炒較佳，O依家累積升幅唔細，落注前更要諗清諗楚，定好止蝕位先好入場。
小米收10億減稅紅包
商品股股價平惹嚟炒作，同樣情況都喺鋼鐵股上發生。月前陸羽仁講過鋼鐵股估值低，但可能受制中美貿易因素，之後鋼鐵股表現唔曳，慢慢上升。早前內地公佈鋼鐵業整體營運數據，行業利潤全年增長達41%，可以估計鋼鐵股公佈嘅業績唔會差，只係鋼鐵股賺錢多，同控制產能有關。O依家利潤好，鋼企又會唔會鬥快加產能呢？不過以估值嚟講，鋼鐵股仍然屬於唔貴嘅類別。
大市偏穩，市場主要留意中央政府周二發表嘅工作報告，皆因阿爺政策等同派錢，小米創辦人雷軍形容，中央一聲下令減稅，小米(1810) 就交少10億稅，等如佢開人大會議，就攞咗個大紅包。不過小米噚日跟隨科技股走勢，回吐1.1%。
市場觀望阿爺公佈更多支持經濟政策，A股四連漲，兩市成交額升至超過1.1億元人民幣，創2015年11月以嚟新高。恒指升勢就遜色啲，全日收報29037點，升76點，企穩二萬九樓上收市，係2018年6月以嚟第一次。成交金額就連續11個交易日超過千億元，達1145億元。
中央未有再明確提及房子非作炒賣嘅言論，加上傳出部份城市嘅樓市政策將轉趨寬鬆，內房股吸引市場追捧。上月合同銷售增8%嘅碧桂園(2007) ，一度升至11.74元，收升1.4%，報11.42元；預期去年盈利增九成嘅中國恒大(3333) ，一度升至27.8元，收升1.4%，報26.25元。
陸羽仁
金融High Tea 舊文
來源 source: http://hdfin.stheadline.com