冰說聰明 - 青冰 2019年5月9日
馬上成為壹會員
會員註冊/登入
【冰說聰明】劈價沽貨 別有用心 - 青冰
哈電集團去年底建議私有化哈電股份，哈電股份股價本周二曾急插3成，惹人聯想。互聯網圖片 適中字型 較大字型
哈爾濱電氣（1133）早兩日上演超級過山車，唔知戰友有冇留意？去年底大股東建議私有化哈電，作價4.56元，消息公佈後爆升56%。同時期合和也宣佈私有化，兩隻股份在初期，同樣保持跟私有化價有逾12%的折讓，不過時日過去，合和的折讓愈見收窄，哈電就長期有一成水位，最終合和都私有化成功，撤銷埋上市地位。
星期二乃哈電特別股東會投票日，小股東們無論有冇份去投票，應該都睇實股價，睇嚇有冇春江鴨畀到指示大家。就在上午約11時，股價忽然急插，在短短幾分鐘跌半成，跌穿4蚊，波動市況中，股份跌5%係閒事，但這些私有化標的，幾巴仙的波動，特別容易觸動各股東的神經。
未知是否羊群效應，跌穿4蚊後人踩人，未到11點15分，股價已低見3.01，即係跌28%，只要你夠貼市，相信都會覺得，投票應該出咗事啦。不過中午前逐漸收復失地，午市收報4蚊，睇返成交，在11時前成交只有140萬股，但在11時後竟有3,299萬股，當中應有不少是止蝕盤。
中午刊出的投票結果，嚇大家一跳，獲得超過75%出席或授權投票的獨立股東贊成，及少於10%反對，即係通過咗。不過再細心睇私有化條件，投票過咗之後，在5月20日前，還需要90%股東接納私有化建議，才算成功，但睇返投贊成的股東，只有2.84億股，即係只代表了42%的股東，距離9成接納仲差好遠啊。
咁究竟係邊個在11點忽然劈價沽貨，造成恐慌性拋售呢？相信不會是尋常老散所為，但經歷了過山車走勢，那些偷懶冇去搞投票的，見到低見3.01，感受到失敗之後係會好痛，應該好有決心在這十天八天接納方案，又或者在市場沽咗佢，咁會唔會正中幕後人下懷呢？嗯，陰謀論表面證供成立！
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com