徵稅與否 天堂地獄一念間
2019年05月09日
中國貿易談判團隊再到美國展開談判，同時傳出消息美國若然加徵中國關稅，中國會報復反制。中美各展手瓜，市場聞到火藥味漸濃，陸羽仁昨日話美股有機會受衝擊下跌，說時遲、那時快，杜指周二最多跌648點，波音、開拓重工、蘋果及晶片股領
跌，費城半導體指數下跌2.4%，杜指結果大跌473點，創1月3日來最大跌幅。港股見到美股咁跌法，都係一彈又散。
下行空間大過上行
有「新債王」之稱的著名基金經理岡拉克係睇淡派，相信兩國緊張關係會持續，因為難以在所有問題讓步，最終美國有超過五成機會將關稅升級，他更認為美股步向熊市。這個情況市場肯定不想看到，所以已有反應，美股沽壓加大。由於港股之前領跌美股，港股昨日早段先跌後彈，但隨著內地股市高位回落，上證指數失守二千九關，收報2893，跌1.1%；港股中後段又再跌過，最後跌回開市的低位，恒指收跌359點，跌1.2%，收報29003點，國指更弱，收插163點或1.5%，造11097點，成交金額1076億元。
大市再插，但培力控股(1498) 集團主席陳宇齡疑與恒基地產(012) 李家傑「對賭」，懷疑有人夾高股價，培力控股股價續升，收漲15%，報2.56元，兩日累飆32%，成為跌市奇葩。
美股原先對特朗普有可能加關稅仲係半信半疑，睡了一覺後，美股投資者發覺天氣仲係四處陰霾，開始沽貨。現時兩國埋枱，若然無法有重大突破，周五美國先加二千億美元中國貨關稅，中國出招反制，摩擦有可能升級，個市就有機會再插。當然，如果雙方衝到懸崖邊勒住，個市就會上演絕地反擊。
有中環茶友最近開始減貨，他特別揀手上升得多的股份沽，係一種「止賺」策略。佢話現時恒指仲有29000點，比高位只係回吐咗千零點，若然中美談得成，即日升1000點差不多，若然反枱加稅，咁就唔止跌一日，向下一段時間有兩三千點跌幅，下行空間大過上行。佢話加唔加稅五五波，天堂或地獄，存於特朗普一念之間。茶友雖然減咗啲貨，但萬一不加稅，佢可以掉頭入市買番啲落後股，都可以繼續炒。但若然加稅，佢沽出的急升股恐怕會人踩人踩好難走。
除了貿易戰外，市場話題係日前啟德發展潛力優厚，上周截標的啟德一幅擁全維港景地王，招標結果在昨日揭盅，由新世界(017) 和會德豐(020) 牽頭的超級財團以一百二十五億九千萬天價力壓其餘六家財團奪得，樓面呎價一萬九千六百多元，呎價創區內新高，而且較今年一月批出位於毗鄰面向相同景觀的新地地皮價高出一成三。有大型發展商係截標前已收到風，話今次地價逼近兩萬元。
大地產商都話啟德地貴
啟德新發展區近年成為各大發展商「兵家必爭之地」，紛於區內積極「插旗」，亦勢必成為近年新盤市場的主要戰場，單計會德豐就已有六個發展項目，成區內持有最多儲備的地主。業內人士指，因應區內新盤推售備受市場垂青，帶動地價進一步提升。
啟德區內地皮，係九龍市區最後的靚地，財團不惜高價入場，當中恒基(012) 接了海航兩幅靚地，成本最平，其他都一級級上。
有大地產商同陸羽仁傾起，話以最新投標價計將來賣樓要3.5萬到4萬一呎，地塊雖然係好靚，但以發展期5、6年計，當中有機會也有風險。佢仲指出，近一、兩年土地開標，中資淡出，地皮集中落入幾個本地大發展商手上。這個狀況從有利因素講就係貨源集中，供應有限，從壞處講亦即係風險集中，幾個大財團坐住大堆貨。雖然市場上有剛性需求，但一旦外圍有風吹草動，幾個大財團就會食得好應，所以今次高價奪標財團都係合資形式，大家分散風險。未來啟德仲有七幅地推出，能否級級推高，就要考驗這班大好友的財力了。
陸羽仁
金融High Tea - 陸羽仁 舊文
來源 source: http://hdfin.stheadline.com