智取大市 - 晉佳 2019年6月19日
【智取大市】天價的未來概念 - 晉佳
Beyond Meat憑住疑幻疑真嘅肉味、質感，加上貨源歸邊，一上市就俾人搶到天咁高，市值挾到百億美金。資料圖片 適中字型 較大字型
即使中美貿戰立立亂，但錢實在多，炒未來概念嘅股票供應實在少，仲要呢個年代，乜/輪、B輪、C輪，唔使等到上市就可以集資發展，等到IPO買到已經食緊十手飯。有未來概念嘅公司，要單獨上市甚難，僧多粥少，難怪史上第一隻人造肉股Beyond Meat，俾人搶到天咁高。
Beyond Meat只得1,100萬股份流通量，令其貨源歸邊，於是挾到百億美金市值，估值反映人造肉若幹年後取締部份真肉市場？講緊佢嘅漢堡扒，卡路里同真牛扒相若，鈉仲高過真牛肉。當然無理由咁短視去睇佢，味道、成本、營養價值只會繼續進步落去，未來必有一定市場規模，但股價率先反映到如斯樂觀，實在過份，但亦可以話係趨勢。
上市不久嘅未來概念股有Uber、美團（3690）之類，當然基數不低，但配合自駕概念必具爆發性。Intel自駕的士喺下年推出，佢個CEO估5年後將會有好多自駕車喺街度行。雖然即使未來有5G，自駕仲要克服天雨、落雪等等惡劣環境，但概念越嚟越近係事實，一旦做得到，幾可肯定顛覆運輸業。未來概念畀你買到一定天生有缺陷，又有盈利又有強勁現金流？畀你平買就奇了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com