冰說聰明 - 青冰 2019年7月25日
【冰說聰明】手機股轉勢有跡可尋 - 青冰
舜宇透明度高，股價本星期破位，如果確認放生華為，舜宇將最為受益。互聯網圖片 適中字型 較大字型
正當本港何妖為患之際，大家似乎忘記咗中美仍有貿易戰，按近期的風聲，內地再有金融開放政策，又話準備買多啲大豆，另一邊廂侵侵會見七大科技企業，當中有談到華為問題，種種跡象顯示，放生華為都唔係冇可能，早兩日英國更延遲決定是否將華為列入5G供應商名單，原因就係想搞清楚，究竟美國佬你係禁定唔禁呀，如果我決定排除華為後你走去放生，真係落唔到台囉。
近日投資氣氛差，但有一個板塊靜靜起革命，就係講緊手機相關股。唔知係唔係上文的原因，市場資金已經偷步買入，但首先令青冰留意到的，不是港股嗰幾隻，而是上星期台積電公佈業績，次季表現超預期，管理層暗示最艱難的時期已過，更預期5G設備需求旺，有助公司下半年的業績。唱好5G，如果是國企紅籌，青冰都可能一笑置之，但作為台灣企業，沒必要幫華為吹噓箒，睇法值得尊重，再配合埋佢個圖，嘩，今星期已經逼近52周高位，今月已累升一成。
作為華為的供應商，台積電對業績樂觀，亦代表手機產業鏈的股份，有重新注視的價值，舜宇（2382）及丘鈦（1478），都同時在本星期破位，最弱雞的瑞聲（2018）雖仍在低位徘徊，但都叫做脫離險境了。
如果要揀一隻嚟博，青冰還是屬意舜宇，每月恒常公佈出貨量，已是令人安心的透明度，而這些數字，近月明顯從谷底回升，如果稍後貿易戰有新進展，又或者確認放生華為，舜宇將最為受益，話曬佢都係做華為在內的高階AN機為主。丘鈦不嬲都較波動，而且生意主要來自中低階AN機，如行業景氣，係會受惠，但就少了放生華為這個催化劑。至於瑞聲呢，睇見個圖都已經唔開胃，亦冇乜華為概念，所以落後的股票，還是留給愛炒落後的人吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com