智取大市 - 晉佳 2019年8月30日
【智取大市】美團業績最大看點 - 晉佳
美團優勢明顯，佔據外賣App市場三分二，地位好難被撼動。 資料圖片 適中字型 較大字型
中國嘅大型科網股，除咗3萬億市值嘅騰訊（700）同阿里，以及未上市嘅抖音、TikTok母公司字節跳動、滴滴之外，其餘多間都係4,000億市值樓下嘅公司，例如京東、百度，美團（3690）似乎突破咗呢個台階，向住騰訊、阿里嘅方向進發。
騰訊、阿里、字節跳動、滴滴、美團，共通點係喺某個山頭成為絕對龍頭大哥。美團優勢明顯，佔據外賣App市場三分二。中國嘅行業生態，係成為龍頭之後，地位好難被撼動。美團第二季業績更加有象徵意義，首先，係經營槓桿，喺收入增長50.6%之下，毛利急升179.5%，可見槓桿極高，而且以金額計，收入升76億人民幣，毛利上升51億，經調整溢利就升47億，反映毛利增長可幾乎全數轉化為純利。喺用戶數以至行業滲透率仍呈升勢下，未來美團收入增長幾可肯定，即使公司淡化第三、四季表現，未來純利爆發增長係意料中事。
業績第二個重點，係單季經營現金流31.3億，融資金融只有12.5億，意味住大部份投資可用經營現金流去填補，情況健康並見到可持續性，保住龍頭地位機會高，規模效應比餓了麼強得多，相信較大機會喺餓了麼手上搶市佔率。持股策略好簡單，揸實就得，因為你唔知佢最終跑得有幾遠。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com