【魚樂無窮】騰訊突然回購的啟示（唐牛）
經歷一連串壞消息後，今年恒指已由高位回吐近5,000點，昨日更出現了終極死亡交叉，即50天線跌穿250天線。雖然這個指標，在技術層面上極具震撼力，但由於屬超滯後數據（50天講緊兩至三個月，250天講緊一整年），如果見到死亡交叉才決定止蝕，相信只得
番半條人命，同死冇分別。
滯後還滯後，數據總有record可依，過去死亡交叉出現後，延伸的跌浪可以十分驚人，以2008年金融海嘯為例，其後跌幅高達五成，恒指至10676點才見底。當然，現時市況雖差，但明顯並非海嘯級，始終未見信貸緊縮情況（Credit crunch），所以不能作準。以去年中美貿易戰開打計，死亡交叉出現後曾再跌14%，今年形勢不比去年好，用硬數據估計調整幅度，大家都心裡有數。
消息面上，不計中美貿易戰無定向風，我會睇實兩件事。第一，美國本周及下周有多個經濟數據出台，可驗證美國國債孳息倒掛虛實，有乜三長兩短，美股隨時出現新一輪調整浪。
第二，騰訊（700）周三出其不意回購，碰巧股價正考驗320元支持力度。翻查紀錄，騰訊去年9月在差不多水平回購，結果1個月後，股價跌穿270元水平，托價不成之餘更變負累。
值得留意的是，大股東Naspers分拆業務（主要資產為騰訊）於荷蘭上市，將於下月11日掛牌，在供應增加下，騰訊股價難免受壓，在資金層面睇，又會吸走部份在港持有騰訊的資金，橫睇掂睇，騰訊QQ變GG呢個trade，短線夠曬理據去搏！
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com