小生怕怕股
2019年08月22日
本地外圍無新消息，港股微升38點，報26270點；國指則收報10177點，漲44點，成交751億元。股份按個別情況發展，當中一個因素係炒業績，華潤置地(1109) 公佈中期核心純利人民幣81.1億元，按年升11%，每股派中期息0.129
元人民幣，按年增17%；績後獲市場看好，管理層認為將受惠深圳「先行示範區」，股價一度飆升超過半成，高見33.2元，收升4.5%，報32.85元，為全日最大升幅藍籌股。佳兆業美好(2168) 曾升8%，見15.18元，收升4.6%，報14.68元；集團截至六月底止，中期盈利9066萬元人民幣，按年增長2.9倍。集團去年12月由佳兆業(1638) 分拆上市，前稱「佳兆業物業」，上月中改名佳兆業美好。有幸就有不幸，小米集團(1810) 、煤氣(003) 績後急跌近5%。
美國總統特朗普喺中美貿易談判搞來搞去無突破，近日開始吹減稅，仲講到有兩個選擇，包括資產增值稅同薪俸稅。資產增值稅乃富人稅，有錢人不愁吃、不愁穿，減稅益有錢佬只係令他們銀行多筆錢，對推動消費作用有限，特朗普咁講好明顯係討好財團同金主，希望對方為自己助選，多過從經濟角度考慮。
煤氣倒退成地眼鏡
特朗普吹減稅，但分析認為美國目前失業率仍低，經濟根本不算差，只不過大家因為債息倒掛，所以覺得衰退臨門，根本無必要咁快減稅，特朗普出口術，只係爭取時間同中國角力。債息倒掛吹起的衰退憂慮，令聯儲局下個月減息期望大增，若然到時聯儲局拒絕妥協，不排除美股會有震盪。
美息有可能下調，資金流入債市。香港債市不發達，有穩定收益的股份好似公用股變代替品。不過，剛喺周二宣佈業績的煤氣，就因為業績出乎意料倒退，股價開市就急插。煤氣係公用事業，但無利潤保證，去年公司增長不俗，本來市場估計中期就算無大增長都有小增長，點知竟然會倒退近19%，令分析員大跌眼鏡，股價無可避免作出反映，收報16.2元，大跌逾5%。
煤氣中期失手，主要係天氣熱影響市民少用熱水，仲有係上半年經濟放緩，飲食業用氣需求下降。若然按照呢個說法，7、8月本地飲食業仲慘淡，煤氣都應該受影響。本來以為公用股係避風塘，點知一樣被波及，證明買股無可能不承受風險。由於預期美息下跌，有人就研究是否可以趁跌價低吸？中環茶友話，撇除業績同經濟基本面，從煤氣股份運作規律，煤氣多年來都係末期宣派紅股，到第二季頭炒除淨炒得最開心，之後就係調整期，所以現在係循環下行期，所以壞消息打得特別應。現在股市波幅不定，不想冒險的話可以保持耐心等候機會，或許10月打後會更低。
講起買公用股，市場經常講兩電一煤，但三寶呢期表現一般。最近聽有位替社團打理以億計基金的政經界朋友提起，有隻收息公用股心水，就係8號仔電盈(008) 。政經界朋友話，8號仔現價市盈率高達38倍，但派息有7厘，即係派息多過賺錢。因為市盈率高，所以好多人都不敢沾手。不過，如果細心睇返其派息記錄，竟然連續三、四年都加派息，對好息之徒甚有吸引。
為何電盈能夠派息多過盈利，而且持續可以這樣做呢？政經界朋友話，皆因電訊業需要投資非常龐大，所以電盈折舊金額好巨大，折舊數字扣減盈利，但不是現金支出，但如果睇其現金流就係另一回事，公司完成投資，年年有大量現金回流，所以能夠支持不斷增加派息，只係一般人不懂看財務報表，所以未必留意，所以股價亦無反映。
電盈派息多過賺錢
聽完政經界拆局，再睇電盈走勢，該股過去長期難以突破5元頂位，但亦好少跌破4.1元，現價係長期波幅中間略低水平，數字本來應有一定吸引力。8號仔之所以少人推介，股價亦不反映高息加息因素，另一個原因係2000年科網股爆破後之跌浪太得人驚，搞到股民個個大叫小生怕怕，缺乏沾手興趣，加上蟹貨堆積如山，股價好難上升，變成一隻走上落的悶股，所以就算高息當前，好似政經界咁識得欣賞的知音都唔係咁多。
陸羽仁
金融High Tea - 陸羽仁 舊文
來源 source: http://hdfin.stheadline.com