操盤手札記 - 割柑人 2019年10月22日
【操盤手劄記】人權法掀金融戰 - 割柑人
被視為美國回應香港示威浪潮嘅《香港人權與民主法案》，最快本周喺參議院闖關。 資料圖片 適中字型 較大字型
第20個血色星期日！面對執政者、執法者嘅濫權、濫暴，超過35萬人喺「淚再流」、「恐懼抹不走」之下，繼續上街示威。特首林鄭上周三發表《施政報告》，意圖政治問題，經濟解決，可惜事與願違。市民想要嘅係公義，唔係供樓！
睇返份《施政報告》，最矚目係放寬按揭保險門檻，首次置業申請九成按揭嘅樓價上限，由400萬元調高至800萬元。上車盤指標，頓變800萬元。不過，經濟衰退當前，九成孖展買樓係高風險行為，若樓價跌超過一成，就會變負資產。
被視為美國回應香港示威浪潮嘅《香港人權與民主法案》，上周喺眾議院過關，最快本周喺參議院闖關。法案最辣之處，係美國每年審視香港自治情況，先畀特殊待遇，令到中國重返加入世貿之前狀況，更形成美國同中國「共管」香港嘅政治現實。
中美貿易談判口頭上傾掂數，實際上唔穩陣。正當美國總統特朗普手上嘅貿易牌出得咁上下，上述法案畀佢一張人權牌，喺中美爭霸牌局上，增添施壓能力。法案因應香港情況，設有制裁機制，涉及香港嘅國際金融中心地位，有如中美金融戰前哨。
中國上季GDP只得6%，今季有破六風險。中港股市周一先跌後穩，分別微升1點同6點。市場憧憬中國將會推出救市措施，加上美國月底減息機會超過九成，估計恒指整固後，有機再上27000，短線支持睇26500。
中國科學院宣佈，研究團隊成功破解非洲豬瘟病毒結構，有助研發新型疫苗。受消息刺激，豬肉股急升，萬洲（288）、中糧肉食（1610）、雨潤（1068）分別飆1.6%、5%、23.8%。當中，前兩者上半年都錄得盈利，後者則仍虧蝕。走勢上，前兩者呈杯柄突破，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com