尋找下一隻大昌行
2019年10月22日
美股上周低收，港股預託證券偏軟，但恒指本周開局仍然撐住，收市微升6點，投資者已經不能太過苛求。
市場焦點之一係二線股大昌行(1828) ，由於大股東提出私有化，大昌行股價飆升，收報3.52元，勁升30%。由於現時私有化門檻不低，過往都有私有化建議埋門脫腳
，股民高追就食悶棍。大昌今次私有化出價每股3.7元，向小股東提出私有化，較最後交易日的2.69元收市價，有38%溢價，但仍比上市價5.88元低，有無足夠小股東支持這個私有化建議，實在唔易估計。
大昌行主要在中港及東南亞經營汽車代理，內地汽車行業喺兩年前係景氣循環的高峰期，今年業務出現調整，所以成個板塊下調，加上最近社會事件嚴重影響消費，股價插到近年低位，大股東呢個時候出手，好明顯係想執平貨。
經過昨日急升後，大昌行資產淨值每股5.4元，市盈率8倍，息率5厘。用唔同標準去睇，大股東都出價都係有着數，因為大昌行資產中，包括喺九龍灣嘅維修中心，呢啲物業資產價值變現能力高，而且做生意點都要有經營地點，其他人冇呢啲物業，根本難以競爭，正因如此，大股東才會趁住兵荒馬亂，擲大筆現金來私有化。
美團小米受港股通刺激
大股東有實力低吸，考慮嘅係中長線增值。小股東睇法有啲唔同，主要睇短期回報，因為小股東只係投資唔係經營，今日可以買，明日可以賣，唔同公司管理層收人工要做好盤生意，所以小股東最重要係從回報考慮。現時抬頭四望，可以見到平貨滿街，大昌行係好公司，有基本因素又有資產，但有同樣質素的公司依然不少，現在先快賺一筆，買回同樣質素股份長線投資，等同回報提高三成，理性上有一定吸引力。
有分析指，大昌行當年招股價5.88元，事隔10多年出價比當年還要低一大截，言下之意覺得大股東出價太低。從上市價角度去看，私有化價格確實不夠吸引，但睇返大昌行上市多年，股價最高喺2012年到過10.88元。認購新股的股東呢個時間套現，回報相當吸引，從理論角度上市後股價無大走樣，股東有機會高價套現，可以話責任已經完成。當年冇賣係唔係現在就不應接受私有化，從投資角度回望歷史其實意義不大，最重要係看目前同未來。從昨日股價反應，似乎大家對私有化機會相對樂觀，所以股價升近私有化價格。
過去小股東同基金對私有化出價比較執着，要求折讓不能太低，但經過電盈(008) 私有化要貨不要錢的經驗，大家發覺講原則死坐未必有利，所以後來合和私有化雖然折讓好大，一樣獲得通過。今次大昌行股價急升，對小股東而言係好事，提供一個提前套現的選擇，若然手頭資金不多的股民，可以考慮先沽一半，套現買入其他抵買的殘股，希望找到下一隻大昌行，其餘一半收足全價，兼觀望看看有無加價機會。
大市昨日基本係牛皮，恒指收報26725點，微升6點；國指收報10543點，漲3點，成交金額637億元。藍籌中近排當炒的美團點評(3690) 再急升4.3%，收報96.75元，估計係染藍前大家踩多轉。香港分店被毀的小米集團(1810) 傳納入港股通，急升5%，收報8.98元。同樣獲納入港股通名單，百威亞太(1876) 股價曾升至31.75元，收揚4.3%，報31.45元，成交5.57億元。港交所(388) 宣佈放棄迎娶「皇帝女」後，投資者情緒開始平復，昨日升1.9%，收報242.6元。
中手游孖展有點熱
市場近日似乎傾向炒科企，眾安在線(6060) 抽升8.4%，收報25.75元；閱文(772) 炒高5.4%，收報31.45元；易鑫(2858) 彈4.3%，收報1.97元。招股中的中手游(302) 獲七大基石投資者捧場，半日孖展已錄得超額認購。公司上周六已開始招股，昨日開始首日孖展，認購額達7億元，相當於公開發售部份集資額1.3億元，超購4.4倍。
陸羽仁
金融High Tea - 陸羽仁 舊文
來源 source: http://hdfin.stheadline.com