智取大市 - 晉佳 2019年12月13日
【智取大市】周期股不適宜窮追 - 晉佳
紙業股玖紙由8月低位至今升五成都唔止。資料圖片 適中字型 較大字型
睇恒指，只升咗兩日，但係個別同外貿、製造業相關股，紙業股玖紙（2689）、理文（2314）由8月低位至今升咗五成都唔止，5G概念股瑞聲（2018）更由低位升一倍；周期股累積升幅並不低，某程度反映投資者對於內地經濟回穩信心，由睇淡升溫至半信半疑階段。
恒指幾個月拉勻冇乜鬱，原因係本地概念股因抗爭運動受創拉低咗，加上藍籌太多廢老股；睇返一批體質正正常常中資周期股，期內普遍上升。所以，港股呢兩日升市絕非由低位突破，如今去買周期股並非突破追入，而係高位追貨。
大市要由現水平明顯再升，就要市場對內地經濟回穩嘅信心，由半信半疑提升到高機率。各界預期出年GDP勉強保六，通脹喺今年豬價嘅高基數下，明年低啲亦唔慌低得去邊，低增長配以低估值合理不過，現時市場情緒以至周期股估值，相信算處於低增長預期之下嘅中高股價範圍。
港股升市之中，主板成交破900億元，比起近期平均水平明顯增加。由8月至今，每逢單日成交明顯增加，引到新錢入場接貨，單邊升勢就會作結；好則改為反覆上升，衰則重拾跌市。呢一刻暫不期望有單邊升勢出現，市場亦難以一下子對經濟回穩回復一定信心。因此，周期股追不過。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com