【大茶飯】細節位看劵商有冇心做（青冰）
【大茶飯】細節位看劵商有冇心做（青冰）
有戰友近日搬倉，由本地小型劵商轉投有內地巨企撐腰的劵商，一來貪佢平，二來真的受夠了舊劵商的hea做，初步用落感覺良好，但亦可能只是以往受的待遇太差，現在如獲至寶而已。
青冰有十幾廿年炒股經驗，實在係睇住行業的
變化，由電話落盤，轉至網上落盤，本地中小型劵商都尚且跟得到，但最近五年的變化，加上內地劵商的加入，無疑令本土劵商更難做。相信現時大家炒股都會用app做，其實睇個app亦都睇到間公司有冇心繼續投資，還是抱著過得一日得一日的心態。
劵商app能買賣股票，提存資金，相信係極基本的事，申請IPO看似是簡單的事，原來都不是每個劵商app能做，「請聯絡你的經紀或客服」，睇見這些訊息真的想爆粗呀。證監早兩年開始規定所有用電子渠道的證券戶口，都要在登入時有雙重認證，相信大家都知吧，而青冰都相信，大家的手機亦用緊生物認證，用指摸或你副尊容，咁期望劵商的app能用這個功能去登入，亦是理所當然吧，不過幸福當然不是必然啦，用SMS或用外置的token形式，為數仍不少。
青冰喜歡看細節位，而看這些app，亦可看到間劵商有冇心做，是否在乎客戶體驗。舉個簡單的例子，在競價盤時段落限價盤，除非有特別原因，否則梗係想在競價時段掛出去，霸個靚位沽嘛，但有些app的default，就是普通的限價盤，只會在9時30分開市後，才掛出去，換言之，你每次都要將個模式改為競價限價盤，好喇，如果今日你有4隻IPO股上市，你落四次盤，要改四次煩唔煩？
現在是2019年了，個app有條件盤都好應份吧，所謂的條件盤，已經不是講專業一些的程式盤，如vwap盤之類，而是排個遠啲嘅價，或者將個盤排一兩星期，舉個簡單的例子係美團(3690)，隻野咁chok大家都知，現價104蚊，你想100蚊撈，都不是太過份，美團一格係0.1元，正常劵商應會限制你排20格，因為怕你落錯盤，廿格即係兩蚊啦，咁你想掛100蚊，等佢跌到102蚊再來排啦，但每個客戶都咁貼市咩？一個條件盤，跌至102蚊時掛一個100蚊買盤，搞掂。
市靜時這些未必是大問題，反正都唔多trade，但埋下伏線，市旺時就應該會被激親了。
--
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com