金手指 - 孫柏文 2020年1月7日
【金手指 】「止暴制亂」壽終正寢 - 孫柏文
駱惠寧做中聯辦主任之後，從數據分析，「止暴制亂」將壽終正寢。
資料圖片 適中字型 較大字型
習大炒王志民後，搵咗駱惠寧做中聯辦主任。駱主任企喺中聯辦lobby見記者，從佢講話，我可以百分百肯定，「止暴制亂」壽終正寢。
我作為財演，寫得喺財經版，當然就係以數據分析啦。咩數據？當報新聞嗰啲，清一色都係講啲唔講啲駱主任講咗乜，我作為盡責嘅財演，當然去中聯辦個網站睇原稿啦。我係好科學咁搜尋「止暴制亂」一詞嘅出現次數。
我嘅預期係「止暴制亂」出現嘅頻率，必達當年梁特讀施政報告時，「一帶一路」咁勁！點知，駱主任一次都冇講過「止暴制亂」！咁都未止，佢完全捕捉到所有香港人都有嘅港女DNA。即係每個決定有三個影響因素。排第三，就係有冇著數。第二嘅就係有冇feel。有feel時，冇著數都得。不過對港女最緊要嘅，就係有冇面。就算同條仔一齊有feel有著數都好，冇面嘅都係要分手獨立。
駱主任話：「香港同胞為國家改革開放和現代化建設作出了重要貢獻！」而唔係話：「我告訴你們香港人，沒有我們你水也沒得喝！」中共真係勁，想180度飄移，就真係飄移。今次呢盤show hand，我哋香港人揸住一對8（金融中心地位）曬冷叫開牌。點知中央真係二仔底。所以最後，嗰啲諗住喺年宵賣啲印咗「止暴制亂」T恤嘅朋友，快啲割價求售啦。因好快唔值錢了。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com