上周六起，內地入境人士需要強制檢疫14日。先唔講「強制」係靠「自律」、「檢疫」唔係「隔離」，單講以潛伏期14日計，係咪有效？武漢1月23日封城，上周
三剛好兩周，每日仍錄新增確診，分別為1,766、1,501、1,985、1,379、1,921宗，仍未見頂。
港府死不封關，檢疫又揸流攤，林鄭抗疫，完全離地，國家衞健委鍾南山就大巴摑落嚟，指潛伏期最長可達24日！全城鬧口罩荒，市民無罩唔敢出街。香港電視（1137）CEO王維基以雙倍價買口罩機，市民like爆。
港股本來無口罩股，但一夜之間湧現，五菱汽車（305）、中石化（386）、比亞迪電子（285）亦兼職生產口罩。至於銷售口罩，如經營屈臣氏嘅長和（001）、經營日本城嘅國際家居（1373）亦成口罩概念股。
財政司陳茂波坦言，今趟疫情對本港經濟嘅影響，可能超過2003年沙士。睇番當年，係經濟先衰退，疊加通縮，才到沙士；今趟則係先有武漢肺炎，衰退可能延續到年尾，通縮可能好快嚟。睇怕有排捱！
中國疫情嚴峻，影響工業生產，拖累全球多個產業鏈。本周工廠春節假後復工，一來封城拖慢復工進度，二來復工或致社區爆發，必須留意。周一，滬股升0.5%，港股跌0.6%。恒指收27241，初步支持為上周四上升裂口26926至27029。
口罩股成逆市奇葩，香港電視飆26.2%，市值超越TVB（511）。不過，生產口罩要有無汙染廠房，要有足夠原材料，短炒口罩股，忌盲目高追。至於銷售口罩嘅概念股，國際家居睇高一線，日本城除咗賣口罩，主要賣家品，涵蓋衞生清潔用品；而且股息率7厘，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com