【大茶飯】「疫」市之贏家（青冰）
【大茶飯】「疫」市之贏家（青冰）
因疫情而起的股，最後能化做盈利的，可能只是短期影響。更多
這兩星期表現得最好的股份，應該都是抗疫股了，主力係香港電視（1137）及日清（1475），上周搶廁紙搶米搶糧油，金源（677）、維達（3331）及國際家居零售（1373
）都有跟風，跟住已經愈炒愈偏，恒發（097）有超市喎，CEC國際（759）旗下阿信屋有零食有乾貨喎，冷股都轉熱，其實上周發盈警的永旺（984）都有超市，不過市場未炒到。
香港電視受惠結構性變化
這個武漢肺炎要搞幾耐，相信無人會知，但以上的疫情股，即使未等到疫情完全過去，動力應該都會消退，簡單啲講，你買即食麵買米買乾糧，是否已經超過你三幾個月的消耗量呢，好喇，就算冇買凸，日日叫你食即食麵都唔掂呀，咁唔健康，紙巾及清潔用品當然覺得會常多，但隨著大家減少外出，在家辦公，或許會比想像中消耗得少。總而言之，現在儲凸的物品，或會在疫情過後慢慢用，信用卡就係先使未來錢，呢啲就應該係先買未來貨，兩者都要還嘅，後者就係日後會買少啲，所以會否「一節淡三墟」，令相關公司首季業績靚爆，而之後收縮呢？
因疫情而起的股，最後能化做盈利的，可能只是短期影響，當然咁都足夠炒一轉，但如果不能化成結構性改變，都係要留意返識落車的硬道理。以這個邏輯諗，香港電視（1137）可能會受惠結構性變化，青冰的朋友當中，有唔少係之前好少幫襯王維基，但經此一「疫」，已經一齊搶貨，買買嚇仲覺得幾方便，而王生做生意的確叻，自己買口罩機做生產商，雖然30日後先收貨，遠水唔知能否救近火，但已收宣傳之效。現在流量激增，青冰想買罐奶粉都經常入唔到app，朋友話近期收貨都慢咗好多，這些可能會影響收入，物流團隊成本亦會增多，昨天雖然已發通告話一、二月訂單及收入大增，但要真正睇到盈利條數，應該要幾個月後。
而上文提及的日清，靠香港市民日日食，應該只能有短期刺激，但上月公佈在中國成立合營公司，在一線城市進口及銷售日本食品，這個應該較有前景，預計次季開展業務，你知內地人對日本嘢咁喜愛，這個隨時成為今年增長動力。
兩間公司近期都逆市造好，要高追或有心理壓力，戰友可以先留意，再伺機吸納，唔需要一窩蜂去搶啊。
青冰
www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com