資料圖片
大陸前兩年到現時面對貿易戰，經濟受重擊。香港舊年因為反送中條例引發社會動盪，無可避免打擊長遠經濟。現時大陸同香港一齊面對武漢肺炎
嘅第二重打擊，係咪會爆煲先？
先講所謂支爆。大家經常提及，中國債務佔GDP 300%以上，確係高水平，但代表乜嘢？就當中國係一間企業，債務係一年收入嘅3倍，至於企業還唔還到錢，唔單止講收入幾多，仲要講收入穩定性，之後要講成本，包括出唔出到糧，仲要講啲債息幾高，七除八扣後，最後你仍見到中國大企業有盈利有派息。
之前咪講山東民企互保債務，一間冧檔就火燒連環船？的確有風險，不過，借錢畀山東民企嘅係邊個？內銀。最後救佢哋又係邊個？地方政府。
中國債務比較集中喺企業，有乜冬瓜豆腐就由地方政府或內銀去頂。內銀有冇危險？就算盤數有幾多水份，但仍然每年派5厘息畀你。如果真係瀕臨爆煲，至少你會見到內銀需要大減派息救國，可能第一、二季經濟差，真係會減派息，之但係武漢肺炎斷估只係搞中國幾個月，呢個世界所有債主都只怕你還唔到利息本金，短短幾個月危機，作為債主斷唔會放棄一個長期有還息能力嘅大債仔。況且，中國企業最大債主係邊個？咪又係中國自己。債重，同埋即時支爆嘅機會，並唔一定對等的。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com