股市向來如鐘擺運行，恒指兩周暴瀉3,000點後，再用兩周反彈1,800點。武漢肺炎陰霾未散，為何恒指時而26000，轉眼又逼
近28000？重點在乎「信心」二字。2月初新增確診開始下降，有醫學權威預計2月底疫症見頂、4月結束，你可以唔信，但大戶有藉口炒番上，股市是錢多話事，無得拗頸。
本周進入2月中下旬，是開始驗證利好消息的時候，如疫症真的見頂回落，固然是好事。如不幸未有兌現，很自然會陷入「究竟要拖幾耐」的恐慌，零售、餐飲、旅遊股，又要再洗一轉。
另要，留意大陸復工情況，越來越多企業復工幾日，就集體感染要再停工，令瘟疫由湖北大規模蔓延全國、以至世界各地，就唔係見26000咁少了。上文之所以話值博率顯著下降，正因如此。
「邊爐家族」一役令市民對火鍋聞之色變，但海底撈（6862）卻由低位反彈1成，全線停業都有得升，搞邊科？招銀最新報告就認為，目前預計只會停業1個月，拖累全年盈利降22%，但該行認為影響短暫，長線而言更有助汰弱留強，助海底撈提升市佔率，目標價更由37.56升至39.83元，喪事當喜事炒，問你服未？咁如果停業3個月呢？招行就話盈利會唔見57%。
筆者為證監會持牌人，未持有上述股份財務權益。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.entertainment.appledaily.com