智取大市 - 晉佳 2020年3月20日
美股由高位跌超過三成，並唔係完全因為肺炎疫情拖累，只係疫情將高估值提早引爆。美股估值高完可以再高，狼來了故事始終發生了。
高估值情況近年都冇港股份兒，於是早期美股跌市，低殘港股冇跟足，直至疫情演變成流動性危機，令到大部份港股都突然打個七折，就連公用股、高息股最近都攬炒。
大陸連續兩日發出嚇人消息，周三傳橋水爆煲，睇返文章就會覺得講大咗少少，喺有Volcker Rule嘅美國，未至於令銀行體系出現火燒連環船，但依然嚇到港股半日時間跌千點。至於上星期IIF講話資金流恐怖過金融危機，突然又有大陸傳媒爭住當長文翻炒，又係奇怪訊號。噚日主板成交1,910億裏面，有463億成交涉及港股通買賣，買盤佔311.2億，賣盤佔152.18億。北面奇怪消息亂傳，全球跟沽，但南下資金極活躍，情緒頗極端。
如果想像環球疫情好轉，加上零息、QE，市場會點樣將港股舞高弄低？相信要變返太平盛世都唔易。離奇嘅劇本都要袋定喺身，唔排除有港股V彈，問題係，捱咗咁耐，呢個位相信唔多人仲敢博落去，因為近排博反彈嘅track record太差了，冇人敢再信，話唔定又有第二個狼來了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com