港股上周五大成交大跌，係咪形成消耗性裂口？美股周五晚跌幅收窄，港股黑期反彈400點。
雖然話港股做第二
隻腳，低位其實已低過第一隻腳，恒指跌到市賬率1.15倍，如果計埋末期業績後嘅年尾賬面值上升因素，市賬率再跌落1.1倍左右，反映周期股殘到不堪。
樓市不跌，仍有個股亂炒，市場資金充裕，相信爆煲式股災機會不高。港股面對一眾負面因素，已經反映喺幾乎差無可差嘅估值上。如果閣下揸住港股，年初至今冇乜損傷，證明持倉不太弱，有條件同實力喺大市低殘之下守落去。
舊年12月大陸實行嘅「新版藥品管理法」，有條件容許網售處方藥，點知一場武漢肺炎之下，阿里巴巴（9988）嗱嗱聲將其餘藥品銷售業務注入阿里健康（241）之餘，網售處方藥亦喺疫情下加速推進，容許阿里健康夥拍天貓向3億慢性病患者網上賣藥送藥。
還記得2018年6月，亞馬遜宣佈10億美金收購網上藥房Pillpack，市值單日升咗千幾億港紙，講緊美國網售處方藥物係一個更難畀外行人介入嘅行業，以亞馬遜規模大到咁，依然願意花咁多年精力去做，證明呢嚿肥豬肉幾咁大。如今阿里健康天時地利人和之下，面對大陸網售處方藥加快放寬，市值升至約1,800億，睇怕潛力仍相當強大。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com