資料圖片/互聯網圖片
2月17日，港股再度升破兩萬八點時，本欄指出，港股反彈已經完結，國難財發完，2月初嘅反彈浪係
透支武漢肺炎疫情完結。
喺下跌過程之中，每跌一百點，就會有評論員同報告走出嚟話，股價下跌已反映疫情，然後疫情一過就會好快急速反彈。沙士經驗唔能夠倒模複製到今次危機之上，除咗大家已知，沙士之前已經跌夠跌淨，疫情只係造就一次衰到貼地之外，大反彈嘅前因，就係捱唔到嘅負資產，賣樓嘅賣樓，破產嘅破產。
每次一個巨型反彈，前題必定係上一個牛市過度槓桿嘅投資者，一次過清洗之後，潮退下有褲著嘅強者上車，然後慢慢開始上升。類似情況，喺2008年美國金融海嘯都試過。
大家可能會話，疫情只不過係一次性，唔應該用上兩次危機相比。不過，今次疫情嘅危險在於引發其他原有問題，例如債務危機。今次發生嘅事，起碼令中國今年全年冇咗兩個月嘅生產力，以中國式高槓桿低毛利嘅經營手法，3月又係今年債券到期高峯，還唔還到係一個問題。
撇除貿易戰找數、撇除外資撤廠嘅誘因提升，淨係計停產兩個月而引發嘅債務問題，都好明顯未反映，要有反彈，首先要洗走呢班孭重債嘅人。至於點睇佢哋被洗走未？合理推斷呢班人喺中國賺到錢，會走資嚟香港股樓，而目前港股港樓嘅價格，都未反映出有人好等錢使，要斬倉還債。
當然，聯儲局立即出來暗示減息，有助短期刺激，但只係將生產停頓冇錢還債嘅時間延後。最基本，以今年29174點高位計，起碼調整兩成至23339點，先算斬倉價。到咗嗰啲位，如果冇連鎖反應，弱者淘汰曬，先至有條件話跌完。否則，就算今日武漢病毒突然消失，冇經歷清洗舊有投資者，都只會有反彈，唔會出現巨型升浪。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com