【智取大市】香港泊錢地位大動搖 - 晉佳
港股上周嘅跌勢，反映香港資本市場本質面臨動搖，以後錢泊喺香港可能唔夠安全。 資料圖片
上周五香港藍籌股就連領展（823）、港鐵（066）都可以跌成十個八個巴仙，走資概念嘅友邦（1299）最重創，跌夠一成。呢種跌勢，係投資者用身體語言話畀大家聽，
香港資本市場嘅本質面臨動搖，以後錢泊喺香港可能唔夠安全。試想像，資產安全度由100%跌到80%，就已經形成非減不可嘅因素，價格已經係其次考慮。
過往對於大陸富豪嚟講，錢留喺中國大陸以內，唔完全係自己嘅錢，至少流出去變港幣、美金，先至真正屬於自己嘅錢，未來似乎港幣穩陣程度同美金比已打個折。投資者反應係咪過敏？話唔埋，問題係，資產安全問題係持有股票嘅最基本要求，呢種風險已經令佢哋唔願意承受，減持係權宜之計，冇得諗咁多。
周五恒指突破性裂口低開，無反彈之下跌足1,300點先至稍為喘定，證明大戶覺得23500點呢啲位只會稍瞬即逝，今日唔沽，之後就冇更靚位沽，呢種跌勢好難話一日就完，短期內都難以重返大跌前水平，今日唔低開都算執到。咁啱得咁橋，02年推23條嘅時候，都係大熊市之中，又有疫症出現，一啲對資本市場不利嘅政治決定往往要等跌市先嚟做。不過環境好唔同，當年外資搶住入中國，𠵱家大陸資金搶住流出去，係兩個唔同世界，03年後嘅升市條件，睇怕難再出現。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com